Ralkap nih a dirhmi cozah thar ah rianttuan tti dingin a kan sawm ahcun kan cohlang lai lo, tiah Chin National League for Democracy (CNLD) party i secretary simi Salai Ceu Bik Thawng nih a chim.
Mipi thimmi cozah sin in nawlngeihnak a chuttu ralkap nih cozah thar an dirhnak ah rianttuan tti dingin tlangcungmi party le khua chung party pawl a sawm hna.
CNLD party cu atu tiang ahcun an sawm rih hna lo nain an sawm sual hna ahcun cohlan an tim lo.
Salai Ceu Bik Thawng nih, “Atu tiang ahcun CNLD party cu sawmnak um rih lo. Pumpak pa khatkhat sinah an pehtlaih/lo tu cu ka hngal lo.
“Nain, zung ahcun mah bantuk pehtlaihnak cu um rih lo. Kan sawm sual hna hmah sehlaw cohlannak ding um lo. A ruah zong kan ruat lo,” tiah a chim.
Chin party pakhat si vemi Asho Chin National party cu ralkap nih cozah thar ah rianttuan tti dingin an sawm nain an duh lo.
Ralkap cozah lakmi kong ah CNLD nih duh lonak cathanh a chuah cang.
Salai Ceu Bik Thawng nih, “Ralkap nih uknak hramhram in an lakmi kongah duhlonak cathanh kan party nih kan phuanchuah. Party pawl lakah hmasabik pawl cachuahtu kan si ve caah pumpak in kaa lawm,” tiin a Facebook cahmai ah a ttial.
