Zarhteni ah Mandalay ramṭhen Pyi Kyi Takhun khua ah inn 70 leng a kangh caah umnak ngeilo rammi hna cu tangka kan bawmh hna, Rampumpi Hluttaw Aiawhtu Kawmiṭi (CRPH) nih a thanh.
Pyi Kyi Takhun khua ah inn 70 leng a kangh caah minung 257 cu umnak inn ngei loin an vai.
CRPH nih, “Zatlang Zokhenhnak, Khamhnak le Ṭhialkamnak Vuanci Zung kan dirhmi cu ramchung ah harnak a tongmi mipi thleidannak um lo tein a lamkip in a bawmtu ding vuanci zung asi,” ati.
“Atu lio cu ralkap nih uknak a kan chuh caah kanmah CRPH nih kan dirhmi vuanci zung cu rian pical ṭuan kho lo dingin a phunphun in kham le tlerh a tong.
“Ralkap nih uknak chuh ruangah minung tuahmi harnak phunkip fak piin tuar cio asi, inn kaang ruangah harnak a tongmi hna hi an tuar khun. Inn kaang ruangah inn ngeilo mi hna cu harnak tampi lakah CPRH dirhmi vuanci zung nih mipi sin in hmuhmi tangka ting 70 a bawmh hna.
“CRPH le Zatlang Zohkhenhnak, Khamhnak le Ṭhialkamnak Vuanci Zung nih, ralkap uknak chuh chungah a nunnak liammi hna, hliam a tuarmi hna, tukvelh le hrem a tongmi hna le palh lo buin tlaih a tongmi hna, harnak a tongmi ngakchia, pumtlamtlinglo, nu, tar le nan chungkhar dihlak nan tuarnak kan in tuarpi hna i kan in dirkamh zungzal hna. Hartongmi pawl zong bawmh an hauh rih caah pehzulh in bawmh kan i zuam rih lai tiah thawng kan in thanh hna,” ati.
