Tuni ah Yangon um Denmark Tanzung hmai ah mino pawl nih sandah an piah i Denmark Tanzung lutlai Mr. John Nielsen nih a telpi hna.
“Mah mino pawl hi buai lo tein tanzung ah an ra chuak. Democracy ngah phu an si tiah kan ruah. Democracy phungphai in thimmi cozah sinah uknak pek ṭhan dingin Myanmar mipi kan in dirpi hna,” tiin a official Facebook page ah a ṭial i hmanthlak zong a tar.
Hlan ahcun Denmark nih Malaysia um Chin refugee pawl a rak lak hna nain atu cu a lak lonak kum 10 hrawng si cang.
Ramdang Tanzung Vialte nih Cathanh an Chuah
Myanmar um ramdang tanzung vialte zong nih ralkap uknak chuhmi duhlonak cathanh an chuah.
“An thimmi an cozah nan pawnchuah piak hna ruangah duhlonak a langhtertu le mipi hi ralkap le palek nih tukvelh i sum uh tiah forhfial kan in duh hna.
“Ramkhel hruaitu, zatlang bu hruaitu, cozah rianṭuan le thawngla pawl tlaih le hnahnawhnak pek cu kan cohlang hrimhrim lo.
“Ralkap nih internert le phone line na phihmi le Myanmar mipi an nuhrin covo le upadi nih a pekmi hna himnak na upat lomi zong kan duh lo.
“Myanmar mipi nih democracy, zalonnak, daihnak le ṭhanchonak an halmi hi kan lungtling i tha kan pek hna. Vawleipi nih an zoh peng ko,” tiin cathanh an chuah.
Canada Tanzung, UE le EU member ram palai pawl, Denmark, Czech Republic, Finland, France, Germany, Italy, Netherlands, Spain, Sweden, Norway, Switzerland, UK le US Tanzung nih minsen an thut.
Sinain, kan innpa ram a simi Singapore, Thailand, China, tbk., pawl nih cun ralkap an mawhchiat duh lo.
