Myanmar cozah ralkap he kan i kap lai lo tiin “Rampumpi Kahngol Lungtlinnak (NCA) sachoh ah minsen kan thutmi cu a rawk lo, nain ralkap cozah he cun ramkhel biaruahnak kan pehzulh lai lo,” tiah Chin Miphun Ralkap (CNF) Vice Chairman Dr. Lian Hmung Sakhong nih a chim.
“NCA sachoh cu Myanmar cozah he min kan thutmi si. President zong nih min a thut. Hluttaw hruaitu zong nih min an thut. Ralkap bawizik zong nih min a thut. Mah sachoh cu Hluttaw zong nih a cohlanmi si. Cucaah a fekmi sachoh, a hmun ding sachoh asi.
“Sinain, mah sachoh chungah aa telmi pakhat ‘ramkhel biaruahnak’ cu pehzulh khawh asi lo. Nain adang pakhat ‘kahngolnak’ tu hi cu pehzulh khawh asi, rawhter zong kan duh lo.
“Nain, NLD sinah uknak an pek ṭhan silole mipi thimmi cozah a chuah ṭhan ahcun mah cozah he cun ramkhel biaruahnak tuah dingin timhcia kan si.
“A tawifiannak in chim ahcun, NCA sachoh a rawk lo. Nain sachoh chungah aa telmi pakhat cu pehzulh khawh asi lo i adang pakhat cu pehzulh khawh asi ko,” ati.
NCA minsen a thutmi Karen hriamtlai phu KNU cu ralkap he an i kap i ralkap nih vanlawng tiangin a kah hna sikaw, sachoh chungah aa telmi ‘kahngolnak’ cu a rawk cang maw? tiah an hal.
Dr. Sakhong nih, “Upadi ning ahcun a rawk rih lo. Upadi ning tein an hrawh ahcun anmah [ralkap] lei zong nih a rawk cang tiah thawng an thanh hau.
“Ralkap nih KNU a kahmi hna hi cu ralkap cozah nih NCA sachoh a buarmi asi.
“Cun, NCA sachoh chungah ‘mipi kan ven hna lai’ timi aa tel. Atu ralkap cozah tuahsernak hi mipi ven asi lo.
“Cun ‘mipi hmanmi hmunhma ah um hmun khuar lo ding’ timi zong aa tel. Ralkap cozah nih mipi hmanmi hmunhma a simi sizung, sianginn, tbk pawl ah ralkap a chiah hna. Mah zong hi a buarmi si,” ati.
Atang video ah tling tein zoh khawh asi.
