NUG cozah biachimtu Dr Sasa nih, “France Hluttaw Sang nih Myanmar mipi le NUG cozah na kan cohlan caah France mipi le palai nan cungah kaa lawm tuk hringhran,” tiah lunglawmhnak cathanh a chuah.
“Hluttaw Sang ah kan kong nan ceih chung vialte thintur taktak in kan rak cuanh peng. Atu cu kan tuarnak na kan theihpiakmi kan hngalh cang caah kan i lawm tuk hringhran.
“Hrem uknak tang i kan tuarnak le luat kan i zuamnak cu vawleipi nih nan kan theihpiak, i luat kan i zuamnak cu thil dik asi tiin nan kan cohlan piak.
“Hitin na kan cohlan piakmi le na kan dirpi mi hi kan mipi hna caah a biapi tukmi suttung asi.
“Hluttaw Niam zong nih a kan cohlan ve ding hi kan thlacamnak asi.
“Ral le hrem uknak tangah um zei tluk in dah a har ti cu France mipi nih an hngalh tuk. Liamcia caan ah France mipi cu hrem uknak tangah a rak ummi le luat aa rak zuammi an si.
“Luatnak, zalonnek, mi vialte tlukruannak le thil dik ṭanpinak cu France mipi thisa he ai ṭhen kho lo.
“Ram tampi nih France mipi keneh zul in kan ram cio ah hrem uknak kan doh cio. France tuahsernak le teinak nih mi vialte ruahnak thar le thazaang thar a kan pek. Nihin ah minung tampi nih ruah setsai loin an hmanmi zalonnak tampi hi hlan lio France mipi hna dothlennak theipar an si. Cu luatnak le zalonnak cu Myanmar ram ah ngah ve dingin kan i zuam cuahmah.
“Atu lio hi, kan rammi nuai 54 chungah acheu hrawng cu rawl ei awk tlamtling in an ngei ti lo. A ra laimi thla tlawmpal chungah, khuapi ngan deuh ahcun rawl cawk awk a dih thluahmah cang lai tiah zumh asi. Ralkap nih cun uknak tlaih lawnglawng hi an i hruhpi mi asi. Kan ram ṭhanchonak caah rianṭuan nakin kan ram pumpi khangh dih in mi ruak le ramcar uk hmanh an duh deuh. An duhnak a zul lomi pumpak, mibu, biaknak, miphun, ramkel bu le ruahnak vialte ngol loin an kawl peng hna lai i an hloh peng hna lai.
“Mah ralkap hi cu, France mipi nih nan rak thokmi le atu Myanmar mipi nih ruahchannak dihlak in kan kawlmi luatnak le zalonnak a duh bak lomi an si.
“Myanmar mipi nih kan duhmi hi zalong tein nun te khi asi ko. Ralkap saltaangmi si te khi kan duh lomi cu asi. Lawmhnak teh ve, a kan thah lai i a kan hrawhpiak lai timi thinphan lo, cozah rat paoh ah thinphan si loin harnak chungin kilvengtu cozah ngeih, miphun holh thihter lo, pipu ro le nunphung thlau lo, miphun sinak hlawt in mi kut tang um lo, kan fale hna hi hmailei ah kanmah nakin an siṭhat deuhnak hnga cawmkennak inn ngeih ve le kum 10 leng harsat bu tein i khon in sakmi innlo mit ṭhep kar ah hrawhpiak lo te hi kan duhmi asi.
“Ramdang vialte nih uknak firtu ralkap cozah hi hnong cio ulaw an tangka luhnak sipuaizi vialte phihpiak dih hna uh tiah kaan nawl hna.
“Myanmar mipi aiawh in, France mipi cungah lunglawmhnak chim cawklo ka ngei tiah nolh ṭhan ka duh. Harnak fakbik kan ton lio ah France mipi nih nan kan dirpi mi hi Myanmar mipi nih kan philh hrimhrim lai lo.
“Kan ral a dih tik ahcun, Myanmar mipi le France mipi le democracy dirpi tu ram pawl cu hrem uknak dohnak ah kutsih in kan ṭangṭi zungzal hna lai,” ati.
Theihternak: A sau tuk caah kan duhnak zawn lawng a tawifiannak in kan lehmi asi.
