Dr. Sasa nih, “Min Aung Hlaing le a phu hi Ramdang Misual Biaceihzung (International Criminal Court – ICC) lei in tlaihnak nawl chuah kan i zuam lai,” tiah BBC ah a chim.
Ningani ah UN Security Council (UNSC) nih kutka kharkhumh in Myanmar kong meeting an tuah nain CRPH nih an halmi tlamtling in an tuahpiak hna lo.
Mah kong he pehtlai in Dr. Sasa nih, “UNSC ahcun Myanmar ralkap a bawmtu China le Russia an um caah ka halmi ngah dih hi a har ngai,” tiah a chim.
China le Russia cu UNSC zungzal chungtel an si caah UNSC chungtel ram 15 nih bia an chahmi leetnak nawl (veto power) an ngei. Anmah lungtlin lo ahcun UNSC nih zeihmanh a tuah kho lo.
Dr. Sasa nih, “UN nih Myanmar mipi veng dingin UN ralkap thlah lawng si loin lam dangdangin kan i zuam rih lai. ICC lei in Min Aung Hlaing le aphu tlaihnak nawl (arrest warrant) chuah ding zong kan i zuam lai,” tiah a chim.
ICC an dirhka in atutiang ahhin minung 36 tlaihnak nawl a chuah cang.
Dr. Sasa nih, “UNSC bia chahmi leetnak nawl a ngeimi China le Russia hi asi khawh chungin chawnhbiak kan i zuam a hau. Atu cu cozah taktak kan si rih lo caah chawnhbiak a har ngai.
“Ramdang um Myanmar Tanzung palai pawl nih le Myanmar mipi hnuchit in ralkap lei an ṭan caah anmah he anmah he an i pehtlai kho deuh.
“Kanmah hi phungning cozah kan si khawh ahcun (kan si kho te ko lai i) China le Russia hi bia kan ruah khawh hna hnga. China le Russia nih Myanmar mipi nuai 54 ṭahnak aw ngaih duh loin ralkap bawi lei an ṭan peng ahcun an i palh tuk lai.
“Ralkap uknak kan hrawh lai, 2008 phunghram kan hrawh lai i federal democracy phunghram thar kan ser lai. Mah tik cun democracy a duhmi US, Australia, Japan, Canada, tbk. ram 150 hrawng he pehtlaihnak ṭha kan ngei lai.
“Vawlei cungah ram 200 leng a um i ram 150 hrawng he pehtlaihnak ṭha kan ngeih ahcun amah lung aa rinhmi China le Russia te pawl an cei te lai,” tiah a chim.
Atang video ah tling tein zohngai ve.
