Dr Sasa nih BBC English sinah Daw Aung San Suu Kyi taza an cuaimi, ASEAN le ramdang bawmhnak kong atanglei bangin a chim.
ASEAN kong
“Kan unau ASEAN ram pawl hi kan zumhnak hna a zor chin lengmang cang. Myanmar kong hmalak dingin bia 5 an chahmi zong hi kan hnabeiseinak a zor chin lengmang. Myanmar hmailei kong ceih paoh ahcun Myanmar mipi le mipi thimmi palai – NUG kan i tel peng a herh,” tiah ASEAN cungah a lungtlin lonak kong a chim.
Uknak firtu ralkap nih ‘thimnak kan tuah ṭhan lai’ a timi kong
“Zalong tein le ningcang tein le democracy phungning tein kum 2020 November 8 ah thimnak kan tuah cang. Thimnak dang kan herh ti lo.
“Myanmar mipi duhnak hi upat ding le cohlan ding asi. Mipi nih an duhnak an langhtermi November 2020 thimnak phichuak kha upat ding le cohlan ding asi.
“Phungninglo sahrang ralkap nih democracy phungning tein kan tuahmi kan thimnak phichuak, kan zalonnak le kan mee cu buainak, meithal le a hlawhtling lomi uknak chuhnak in firpiak a kan timh,” ati.
Ralkap nih Aung San Suu Kyi taza an cuai chapmi kong
“Rampi Ruahnak Petu Daw Aung San Suu Kyi le President U Win Myint taza an cuaimi hna vialte hi zeihmanh tatte um lomi si, lih hrokhrawl in an puhmi hna lawngte asi.
“An thil tuah hi upadi ning pakhat hmanh asi lo. ‘Tharphanter uknak’ a hmangmi phungninglo ralkap nih Myanmar rammi nuai 54 hi kum saupi uk kho hna usih ti an duh caah thongthlak dingin lih hrokhrawl in taza an cuaimi hna asi.
“Myanmar mipi kan democracy le kan zalonnak hi phungninglo ralkap nih ṭhihphaih, tlerhkhonh, fahnak pek, tuarnak pek le thah in hrawhpiak dih a kan timh,” tiah ralkap nih Suu Kyi le President Win Myint taza an cuaimi hna a lungtlinlonak kong a chim.
“Sahrang ralkap hremuknak hi ramdang nih an donghter khawhmi asi. Donghter khawhnak thazaang an ngei,” tiah ramdang bawmh kan herhnak kong a chim.
