Dr. Sasa nih, “Myanmar mipi nih buai lo tein ralkap duhlo langhternak (CDM) kan tuahmi Nobel Peace Prize laksawng pek dingin a kan halpiakmi hi a ṭha tuk. Myanmar mipi ruahchannak thar a pek hna lai, ralkap bawi pawl nih tuksapur in an hrem hna buin dinnak, luatnak le daihnak caah an cawlcanghmi le an intuarmi kha vawleipi a theihter chin lai,” ati.
“CDM a lutmi pawl hi Myanmar democracy, luatnak le dinnak caah ni fatin an nunnak phah in ralṭha, lungṭhawng le pumpek taktak in a lutmi lawngte an si. Mah laksawng a kan halpiakmi nih hin, kan luatnak le democracy caah kan i zuammi hi vawleipumpi mi vialte nih an theih i an kan dirkamh ti a langhter.
“Mah laksawng a kan halpiakmi nih hin, CDM nih uknak firtu ralkap cozah a tei cuahmah cang ti le buai lo tein CDM kan tuahmi hi vawleipi nih a kan theihpi ti kha a langhter.
“CDM kan tuahmi nih uknak firtu ralkap cozah a lauter. Buai lo tein duhlonak langhtertu Myanmar mipi cu tuksapur ralkap bawi pawl nih meithal in an kah hna. Luatnak le dinnak caah kan lung kan thleh cang ti kha mipi nih an langhter.
“Hi kan i zuammi, ramdang nih a kan theihpi mi nih hin, Myanmar mipi nih pehzulh in ralkap hremuknak kan dohnak ah ruahchannak a kan pek lai. A ṭhangcho cangmi vawleipi nih kan tuarnak a kan theihpiak i Myanmar thar ngah dingin kan i ruahchanmi a kan dirkamh ti kha a langhter,” ati.
Atang hmanthlak ah tling tein rel khawh asi.
