Myanmar mipi tukvelh, tlaih le thahnawn an ton tinak hnga lo “Responsibility to Protect (R2P)” timi a sual lomi mipi vennak UN phungphai ningin UN Security Council nih hma kan lakpiak, tiah Myanmar Special Palai Dr. Sasa nih March 4 ah a hal.
Rampumpi Hluttaw Aiawhtu Kawmiṭi (CRPH) nih Myanmar UN Special Palai ah a thimmi Dr. Sasa nih UN lutlai Pu Antonio Guterres sinah cakuat in a hal hi si.
“Ralkap nih anmah sermi ralkap council cozah hi cohlang hna seh tiin mipi a tukvelh, tlaih i thahnawn hna. Buai lo tein sahdahpiahtu mipi a thahnawn hna.
“Mah pinah, minung 1 nunnak le khuasak tintuknak, zalong tein sandahpiahnak nawl vialte ralkap le palek nih an chuh dih hna.
“Mah tluk tiangin Myanmar mipi nih hremnak an tuar nain ralṭha tein ralkap duhlonak an langhter peng,” tiin cakuat ahcun a ṭial.
“Myanmar mipi tukvelh, tlaih le thahnawn an tonmi hi ngol dingin UN nih fak deuh in ralkap hi kan chimhhrin piak uh. Upadi ning loin an tlaihmi pawl zong thlah dingin le mipi thimmi cozah sinah uknak pek dingin UN Security Council nih a fak bikin hma kan lakpiak,” tiah Dr. Sasa nih a hal.
UN Security Council nih tuahpiak dingin thil 4 a halmi cu;
1. UN phunghram bangin, innpa ram pawl he i bawm in R2P ningin sualnak ngeilo Myanmar mipi veng hna
2. Ralkap bawi pawl lawng si loin ralkap ta a simi chawlehnak company le an chawva vialte fak piin phitkham hna law dantat hna
3. Ralkap hi zei bantuk ram hmanh nih hriamnam zuarh lo dingin phihkhamnak tuah
4. Ralkap cozah nih mipi a tukvelhmi hna, tlaihmi hna le thahnawnmi hna hi fak piin mawhchiat hna law ramkip upadi ningin luat kho lo dingin an tuhmi theipar zunter hna
