ASEAN meeting biachahmi 5 lakah uknak firtu “Myanmar ralkap le NUG/CRPH kar biaruahnak tuah ding” timi aa tel.
Dr. Sasa nih, “ASEAN meeting ah bia an chahmi cu ka cohlan ko, nain kan halmi 4 hi phungninglo ralkap cozah nih a tuah lo ahcun kan tong naisai lai lo,” tiah Asian Nikkei interview ah a chim.
“Kan lung kan ṭhul lai lo, kanmah he biaruah khawhnak caah cun thil 4 kan khiahmi um. Keimah nih ka khiahmi si lo, Myanmar mipi nih an khiahmi si. Mipi thah kan cohlang kho lo,” ati.
NUG nih ralkap a halmi 4 cu:
- Aung San Suu Kyi telh in November thimnak ah mipi nih an thimmi MP le hruaitu pawl sinah uknak pe ṭhan
- Mipi cungah buainak tuah ngol
- Khua chungah ralkap na thlahmi vialte la dih hna le
- Ramkhel ruangah na tlaihmi vialte thlah dih hna, ti asi.
Ralkap nih February 1 ah mipi cozah uknak a chuh hnu in minung 750 leng a thah cang hna i 4,000 leng a tlaih thongthlak cang hna.
Dr. Sasa nih, “ASEAN meeting ah bia an chahmi cu kan cohlan ko, nain an tuahsernak zoh hmasa rih hau. Cathanh chuah cu a fawite, nain tuahsernak um lo cun pakpalawng asi. Khua chungah ralkap a thlahmi vialte a kirter hna/lo kan zoh lai cu,” ati.
ASEAN chungtel ram cheukhat zong hi mi hrokhrawl an si. Myanmar ram ṭhat ding a duh tak lomi an lo. Meeting an tuah hlan ahcun ‘Aung San Suu Kyi telh in ralkap nih na tlaihmi vialte thlah dih hna’ ti zong telh ding an ti ko nain meeting an tuah tikah ram cheukhat nih an duh lo caah bia chahmi 5 lakah an telh kho lo, tiah ASEAN chungtel ram 2 nih an chim.
Cun, ASEAN biachahmi ṭah lak nihchuak a simi cu ‘mipi thimmi cozah sinah uknak pe ṭhan’ ti loin ‘mipi thimmi le [uknak firtu] ralkap i rem dingin bia kan in ruahter hna lai’ an timi hi si. Fiang tein chim ahcun ASEAN nih ralkap an bawmh bantuk asi.
Dr. Sasa nih, “ASEAN nih buainak donghter a timi hi ralkap nih a zulh lo ahcun, NUG hi ramdang nih a kan cohlannak hnga pelhzulh in kan i zuam ko lai.
“NUG nih kan halmi 4 hi ralkap nih a tuah lo chung paoh cu ASEAN nih zei tluk a kan fial zongah ralkap cu kan tong lo hrimhrim.
“Biaruahnak tuah hlan ah tlinh hmasa dingin ralkap kan halmi hi a tuah lo ahcun, a kan ṭanpitu ram pawl he rian kan ṭuan ko lai.
“Tahchunnak ah; UK, US, EU le Asia ram a simi Japan, India, South Korea pawl hi democracy ram an si i an kan bawmh a hau.
“Japan hi NUG a kan ṭanpi bik tu asi. A hramthok tein a kan ṭanpi peng. Japan he naihniam tein rian kan ṭuanṭi.
“Ralkap bawi tampi nih Singapore ah bank account an i tuah. Singapore cozah nih a kharpiak dih hna awk asi.
“Myanmar ah sipuaizi a tuahmi Singapore le Thailand company pawl zong nih uknak firtu ralkap cozah sinah ngunkhuai pek an ngol chung awk si.
“Ralkap nih mipi thah an ngol hlan le zalam cung ralkap pawl a lak hna hlan cu, zaangfah tein ngunkhuai pe rih hlah uh.
“NUG cozah nih Thailand ah bank account kan tuah khawh cun, Myanmar ah sipuaizi a tuahmi Thailand company pawl cu NUG sinah ngunkhuai pek dingin kan forhfial hna lai. NUG sinah ngunkhuai pek cu Myanmar mipi sinah an pek asi,” ati.
