Falam khua pawng, Taal khua pawngte ah umhmun khuarmi ralhrang Kawl Ralkap motor 9 cu nizaan October 17 zaan ah kan Lai ralkap CNF, CNDF le CDF nih bomb puah in an hrawhpiak hna.
Ralhrang Kawl Ralkap motor 60 hrawng cu October 13 zingka ah Falam in Hakha lei ah an chuak nain kan Lai ralkap pawl nih an kham kah hna i nihin tiang Falam khua pawng ah hmai nor kho lo le Falam lei kir kho loin an i tap peng ko.
CNDF biachimtu nih, “Zahan zaan ah Taal khua pawngah ralkap motor 9 kan hrawhpiak hna,” tiah a chim.
“Ralkap motor cheukhat cu an ke kuai viar.
“Ralkap zeizat dah an thi ti balte kan hngal kho rih lo.
“Tu zingka ah Falam khua in miakpi in voi 2 an kan kah. Raltuknak vanlawng zuan thawng zong kan theih,” ati.
October 14 zaan zongah kan Lai ralkap pawl nih ralhrang Kawl Ralkap motor 7 bomb puah in an hrawhpiak cang hna.
CNF biachimtu Salai Htet Ni nih, “Kawl Ralkap pawl Falam an phak hnu in atutiang ahhin voi 8 kan i kap cang,” tiah a chim.
Sagaing ramṭhen, Kalaymyo lei in Kawl Ralkap 700 hrawng cu motor 60 hrawng le tank 2 khat in October 12 ah Falam khua an rak phan cang.
October 13 zongah Magway ramṭhen, Pakokkku-Kyaukhtu khua in Chin ram, Mindat khua ah Kawl Ralkap 1,000 leng cu motor 90 hrawng le tank 2 in an phan ve.
Mindat a phanmi Kawl Ralkap pawl cu Matupi lei ah tlawmpal an chuak nain nihin tiang Matupi an phan kho rih lo. Mindat-Matupi lam a minmi um fawn. CDF-Matupi nih an bawh fawn hna. CDF Matupi nih an kah hna i ralkap 2 an thah cang hna.
CDF Matupi, Mara le Zotung nih, “Federal democracy phungphai a zulmi mipi cozah a chuah tiang, CDF unau hna nih kan ram cu ralhrang Kawl Ralkap kut in kan ven peng lai,” tiah cathanh an chuah.
