Tuni deihlan sml 4:00am in 4:30am kar ah Hakha khua ah pehzulh tein bomb voi 4 a puak tiah kan theih.
Bomb cu hmun 4 tluk ah aa puak i a puah thawng a thanh tuk caah mi an i hlau dih.
Hi bomb a puahnak thawngpang theih khawh mi cu SAC Chairman Pu Ngun San Aung innhmai ah a voi khatnak a puak i, a dang a puakmi pawl hi Chin-Oo-Sii sang Suhpawng zung hmai, Myanmar Economic Bank hmai le Khuathar i SAC thawngpetu (Dalan) an timi hna innhmai ah a si.
Bomb a puahnak hmun pawl ah ralkap pawl an phan dih i mi kawlhawlnak an tuah cuahmah.
Hi thawngpang a thei mi khuami pakhat nih, “A thawngpang a thang taktak. Zinglei i hngilh lio cio cu si kaw a thi mi le aa hliam mi an um le um lo hngalh a si rih lo,” tiah a chim.
Hi bomb puah a chuak mi hi, ralkap maw an si hnga, mi zei nih dah an puah hnga, ti mi hngalh khawh a si rih lo. – DVC
