Hakha in Thantlang lei kalnak hlei 2;
- Timit Hlei le
- Tita Hlei cu CNF le CDF nih an hrawh cang. Bomb in an puah hrawh hna.
October 20 ah tank 2 le motor 30 hrawngin Hakha a phanmi Kawl Ralkap pawl Thantlang lei lan kho hna hlah seh tiin an hrawhpiakmi hna asi.
Timit Hlei cu Hakha in meng 3 hla ah a ummi si i Tita Hlei cu Thantlang khua phak lai meng 4 ah a ummi si.
Timit Hlei cu nizaan October 21 zingka 9am hrawngah bomb an puah.
Tita Hlei zong cu nizaan 11am hrawng ah an puah ve.
CNF biachimtu Salai Htet Ni nih, “Hakha in Thantlang lei kalnak cu mah lam pakhat lawng hi a um. Minung le saikal kalnak lam dang pakhat hmanh um ti lo,” tiah a chim.
“Lam um ti lo caah an motor pawl fawi tein an kal kho ti lai lo. Ke in ral an doh ahcun harnak tampi an tong lai. Hakha in Thantlang peng ah ralkap thazaang chap zong a fawi ti lai lo,” ati.
Hakha le Thantlang cu meng 21 hrawng aa hlatmi asi.
Hakha a phanmi Kawl Ralkap pawl hi Thantlang peng, Tlanglo khuataw ah ummi CNF zunglubik Camp Victoria sakhan tuk lak dingin Sagaing ramṭhen, Kalaymyo lei in a rami an si.
