Myanmar ram aiawh in Thailand ah Miss Grand International aa zuammi ngaknu Han Lay nih zuamnak stage cungah uknak firtu Myanmar ralkap duhlonak kong a chim i ṭah buin ramdang sinah bawmh a hal.
Miss Grand International Thailand president Nawat nih, “Myanmar ralkap nih uknak a firmi hi mipi caah fahnak, tuarnak le harnak lawng a chuahpi. Han Lay cu ka si khawh chungin ka dirkamh i ka si khawh chungin ka bawmh lai,” tiah a Facebook page ah a thanh.
Myanmar ralkap nih sandahpiahtu mipi 100 leng an thah hna ni Zarhteni kha, Miss Grand International zuamnak final ni asi. Thailand rampumpi ah TV in an thlah pinah vawlei cung ramkip hmuh dingin Youtube zongah live an thlah. Ramkip in aa zuammi vialte nih an i tinhmi an chim cio.
Han Lay nih cun, vawleipi sinah biachimnak caan sunglawi a ngeihmi cu Myanmar mipi dirkamhnak, ralkap duhlo langhternak le ramdang bawmh halnak caah a hman.
“Atu mah bia ka chim lio, tuni hi ka dawtmi Myanmar ram ahcun kan ram democracy caah sandahpiahtu minung 100 leng zalam cungah an thi,” ati i a ṭap.
“Zaangfah tein Myanmar bawm uh. A rannak in ramdang bawmhnak kan herh. Vawlei ṭha deuh ser hna usih… Myanmar telh in vawlei ah daihnak leng ko seh,” ati.
Bia a chim dih in, Michael Jackson hla Heal the World (Vawlei Damter) timi chungin tawite:
“Vawlei damter,
lennak hmun ṭha chin ser,
nang caah le kei caah le miphun vialte hna caah.
“A thi cuahmahmi an um,
a nungmi zawn na ruah ahcun,
lennak hmun ṭha chin ser,
nang caah le kei caah,” timi a sak.
Han Lay nih mah bia a chim khawh hnu ah Thai media nih bia an hal i, “Vawleipi theih in Myanmar ralkap chiatnak ka chim caah kan ram kir lai ka ṭih tuk,” tiah a thinphannak kong a chim.
Han Lay cu a donghnak minung 20 (Top 20) thimmi lakah aa tel ve nain laksawng cu a ngah lo. USA aiawh in aa zuammi Abena Appia nih a ngah i pahnihnak cu Philippines aiawh in aa zuammi Samantha Mae Bernardo nih a ngah, pathumnak cu Guatemala aiawh in aa zuammi Ivana Batchelor nih a ngah.
Michael Jackson hla tling tein ngaih a duhmi caah atang video ah ngaih khawh asi.
Thawng Bawi @Cung Lian Thawng nih Lai holh in a sakmi
