Crash Landing On You drama ah lemcang a ttuanmi minta Hyun Bin le mintami Son Ye Jin cu video chung lawng siloin a taktak ah an i duh tiah phuan a hung si.
Crash Landing On You cu a lar ngaimi drama pakhat a si. South Korea mirum nu pakhat cu paracute aa cit lio ah ruah lo piin North Korea vawlei ah a tla i cutin North Korea ralkap (Hyun Bin) nih he an i hmu.
South Korea mirum nu in lemcang a ttuanmi Soe Ye Jin cu a himnak hnga Hyun Bin nih a inn ah a umter, cutin duhsah tein an um ttinak ah an i duh beh timi le North Korea si ning kong an thlakmi a si.
Hyun Bin le Soe Ye Jin an i duhnak kong cu Korea minthang kong a phuangtu Dispatch nih January 1 ah a hun thanh. An i duhnak thla 8 si cang a ti fawn.
Hyun Bin agency simi VAST Entertainment company nih, “Minta Hyun Bin le Son Ye Jin cu rian an ttuan ttinak in an i hmu. Drama an i thlakmi a dih hnu ah an i duh hi a si. Mipi zong nih an i duhdawtnak hi a thatnak in hmuhpiak ding le hmailei zong ah tha nan pek rih hnanak lai kan in sawm hna,” tiah cathanh a chuah.
Cu bantuk in Son Ye Jin agency simi MS Team Entertainment zong nih, “Rian an ttuan ttinak in aa theimi an si. Drama thlak a dih hnu zong ah khat le khat pehtlaihnak an ngei rih i a hnu ah an i duh hi a si,” tiah cathanh a chuah ve.
Dispatch nih Hyun Bin le Son Ye Jin an i duh tiin thawng a thanh hlan ahhin an i duh tiin biachokvai a leng pah lengmang nain kan i duh lo an ti peng.
Hyun Bin le Son Ye Jin cu 2018 chuak movie ‘The Negotiation’ ah lemcang an rak ttuan tti bal cang. Cun, 2019 chuak ‘Crash Landing On You’ drama ah lemcang an ttuan tti tthan i cutin aa duh behmi an si.
