Atu hi India ram cu Covid-19 zawtnak nih khoh 2nk a den lio si i mizaw an tamtuk caah sizung ah ihkhun le oxgyen an i za ti lo.
Covid-19 in a thimi zong an tam tuk i thlanhmun vawlei zong an i za hnik ti lo.
Sizung cheukhat cu Covid-19 mizaw an khirh hna caah chungkhar an lungrethei tuk i social media ah sii le mizaw ihkhun bawmh an herhnak kong an ttial len hna.
“Covid-19 mizaw an tam chiahru. Sizung i counter min peknak khan (lobby) zong mizaw chiahnak khan ah kan thlen,” tiah Mumbai khuapi um sizung pakhat i rianttuanmi Jalil Parkar nih a chim.
“Oxygen a um lo. Sizung ihkhun dam a har. Covid-19 test zong a har tuk, zarh 1 leng hngah a hau. Zeizong te tlangtlak khawh a si ti lo,” tiah New Delhi i Ngandamnak Zung rianttuan pakhat nih a chim.
India ram chungah Nithumni lawng ah Covid-19 mizaw thar 295,041 an hmuh hna. Cun, Covid-19 in a thimi 2,023 an si.
Nihnihni ahkhan India Prime Minister Narendra Modi nih “Covid-19 ral nganpi kan do. State pawl nih tuah awk dang nan theih ti lo hnu lawng ah lockdown cu tuah uh” a ti.
Nithumni i Covid-19 in a thimi lakah mizaw 22 cu oxygen pek hau an si nain oxygen um lo ruangah a thimi an si.
Oxygen an i zat lo caah khua le state hruaitu pawl nih rampi cozah sinah sii le oxygen tam deuh pek dingin an hal.
PM Modi nih ram pumpi ah oxygen dur 100,000 kuat an timhnak, oxygen thar ser/chuah ding kong le Covid-19 mizaw lawng zohkhenhnak sizung sak an timhnak kong a chim.
