India ram, Nagaland state ah India Rampumpi Cozah Ralkap nih inntek Naga mipi 14 bak an kah thah hna caah Naga mipi an thinhung tuk i ralkap sakhan cu lung in an cheh i pawngkam um ralkap motor an khangh thluahmah hna.
Zahan December 4 zaan ah Nagaland state ah umhmun khuarmi India Rampumpi Cozah Ralkap nih rian a ṭuanmi Naga mibu cu tapung ah an ruah hna caah an kah thah hna. Mah ruangah mipi thinhung in sandah an piah i ralkap 1 an thah ve.
Mipi cu ralkap sakhan hmai ah sandah an piah i ralkap sakhan cu lung in an cheh i pawngkam um ralkap motor pawl an khangh hna. Mipi 12 leng hliam an tuar i ralkap tlawmpal zong an tuar ve, tiah India Ralkap Vuanci (New Delhi ummi) nih a thanh.
India Ramchung Vuanci Amit Shah nih, “Sualnak ngei lo mipi, khuami an thah hna timi thawngpang ka theih cu ka lungrawk tuk hrinhran,” ati.
Nagaland State Vuancichoh Pu Ngeiphiu Rio nih, “Hlathlainak kan tuah lai i mipi thattu ralkap cu dan kan tat hna lai,” tiah Reuters media ah a chim. “Sungṭhoh pawl nih an i palh ruangah mah thil a chuahnak hi si,” ati.
Nagaland state cu kanmah Chinmi/Mizo bantuk lawngte an umnak asi i Laimi bangin miphun ṭengnge (Zomi, Lai, Kuki, tbk) an tampi ve.
Rampumpi Cozah (New Delhi) nih kan state kokek chuak vialte a fir dih i kan state ṭhanchonak caah zeihmanh a kan pe ve lo… tiin hriam a tlaimi phu tampi an um.
Mipi 14 an kah thahnak hna hmun cu Mon district um Oting khuate ah asi. Cuka cun tuni ah mipi nih sandah an piah.
“Lengah a buaimi mibu an um i lung in an kan cheh,” tiah min langhter duh lomi sakhan um ralkap pakhat nih Reuters sinah a chim.
“Tunai te khan Assam Rifles nih sandahpiahmi an kah hna i minung 1 a thi. 2 hliam an tuar,’ tiah Konyak Siangngakchia Bu president Neklem Konyak nih Reuters ah a chim ve.
Konyak cu Mon district ah milu tam bikmi miphun an si.
Assam Rifles nih mipi 14 an kah thah hna nak aruang
Myanmar ramri um Oting khuate ah India Rampi Cozah Ralkap (Assam Rifles) nih tapung kawl thianhnak an tuah.
An khua pawng leitang chuak cawhnak hmun ah rianṭuan minung 30 hrawng thilphor motor pakhat in Assam Rifles sakhan pawng in an kal.
“Sungṭhoh pawl nih nan pawngkam ah tapung an um tiin Assam Rifles cu an chimh hna. Thil phor motor pakhat in minung tampi an kalmi an hmuh cangka in tapung an si tiin an kah hna i 6 an thah hna,” tiah palik bawi nih a chim.
“An kah thahmi hna thawngpang cu Oting khuami nih an theih cangka in ralkap sakhan cu an kulh dih colh. Assam Rifles ralkap motor pawl an khangh hna i sakhan chung ralkap cu lungin an cheh hna.
“Ralkap nih an leh hna i meithal in an kah hna i minung 8 an thah chap hna. Ralkap 1 a thi ve,” ati.
