India Restaurant Ngeitu Malaysia Rammi Bu (Primas) nih, “Asi khawh ahcun cabuai 1 minung 2 lawng ṭhut ter dingin 6am in 10pm tiang restaurant onnak nawl kan pe,” tiah Malaysia cozah an hal.
“Kan ram chung COVID-19 pulrai aa peh peng ruangah restaurant pawl kan tuar tuk cang.
“Restaurant pawl hi cozah nih asi khawh chungin lam hme tete tal in a kan bawmh hau.
“Cabuai 1 minung 2 lawng ṭhut ter dingin 6am in 10pm tiang onnak nawl a kan pek colh hau.
“Lockdown hi caan saupi aa peh ahcun, restaurant ngeitu acheu hrawng cu an sungh tuk cang lai caah dawr khar thai an hau cang lai.
“Cucaah, cozah nih COVID-19 zulhphung felfai tein zulhter in restaurant pawl hi minung tlawmte in onnak nawl a kan pek hau.
“Nai ah restaurant ngeitu minung 1,000 bia kan hal hna tikah, 800 cu ni kum MCO 1.0 thokin atutiang ṭha tein dawr on a ngah lo ruangah ti, mei le inn man pek awk hmanh an hmu huaha ti lo. 700 hrawng cu an rianṭuan pawl zong a caan hman tein lahkhah an pe kho ti hna lo.
“250 hrawng cu inn ngeitu nih dawr hlan man an ṭhumh hna. 200 lawng hi cozah tangka bawmhnak SME Corp Malaysia an ngah kho.
“Hi boruak kan pah khawhnak ding ahcun, cozah nih thla 6 chung credit score hnorsuan lo dingin bank tangka cawinak a kan tuahpiak hau.
“Dawr hlan man zong cozah nih a kan bawmh hau. Kan rianṭuan ramdangmi pawl cozah nih tax a lakmi hna zong 25% a ṭhumh hna hau,” an ti.
