Zei ram hmanh nih an tuah bal rih lomi cu Israel ram nih tuah dingin bia a chah cang. Ngandamnak rianṭuan le kum 60 cung vialte cu COVID-19 raikhamsi voi 4nk chunh hna dingin cozah nih bia a chah.
Israel ram ah COVID-19 rungrul thar Omicron a karh tuk lai i ni fatin mizaw thongsawm tampi an phan lai, tiah thiamsang pawl nih an zumh caah cozah nih atu bantukin raikhamsi voi 4nk i chunh dingin bia a chahnak hi si.
Ngandamnak Vuanci Zung director-general Nachman Ash nih mah kong cu nizaan ah rampumpi TV ah thawng a thanh.
Chawnh khawhmi zawtnak lei thiamsang Dr. Ron Dagan nih, “Raikhamsi voi 4nk i chunh hi san a tlai deuh timi tatte a um rih lo. Hohmanh nih an hneksak rih lomi si,” tiah a chim.
Minung ting 90 (nuai 9) fai an umnak Israel ram nih cun raikhamsi chunh hi pulrai dohnak hriamnam nganbik ah a hmanmi asi.
Hmasa Prime Minister Benjamin Netanyahu nih Pfizer company lutlai sinah raikhamsi nuai tampi cawk dingin min a rak thut cang, Israel hi raikhamsi a caw hmasa cemmi ram ah aa tel ve.
Raikhamsi voi 3nk chunh zong a thok hmasa bikmi ram asi. Voi 3nk chunh dingin vawleipi a hruaitu asi, ti khawh asi. A rammi vialte voi 3nk a chunh dih colh hna i thih fawi tukmi Delta rungrul cu zarh tlawmpal chungah a kham khawh colh.
Nikhatni ahkhan, Tel Aviv khuapi hriangum Sheba Medical Center sizung rianṭuan 150 cu raikhamsi voi 4nk an i chun colh cang – voi 4nk chunh santlaih/lo hneksaknak ah an i chun.
Hmasa hlathlainak an tuahmi ah, raikhamsi voi 3nk aa chunmi cu an pum chungah COVID-19 rungrul dotu tam deuh a um caah Omicron rungrul nih a tlunh hna zongah voi 2 lawng aa chunmi tluk fakin an zaw lo ti asi.
Sinain, Israel scientist pawl nih, “Raikhamsi voi 3nk aa chunmi pawl cu an pum chungah COVID-19 rungrul dotu a tam deuh ko nain thla 4 hnu ahcun an pum ah COVID-19 rungrul dotu tamtuk a zor, a zor rang tuk,” an ti.
UK Ngandamnak Zung nih hlathlainak a tuahmi zong nih, “Voi 3nk aa chunmi cu an i chunhka cun an pum ah COVID-19 rungrul dotu a tampi ko nain thla 3 fai (zarh 10) hnu ahcun cheuli-cheukhat (25%) bak a zor,” tiah a langhter ve.
Raikhamsi voi tam deuh chunh hi a ṭhami zong asi kho men nain, a ṭha lo chin zong asi kho ve men.
Zei khom si ah, voi 3nk chunh dingin Israel nih vawleipi a hruai bang voi 4nk chunh a ṭhat/lo kong zongah vawleipi a hruai ṭhan ko lai hih.
A ra laimi thla tlawmpal chung cu, pulrai kongah ramdang vialte nih hngahhlang ngai in Israel an cuanh cio lai tinak asi.
Israel nih raikhamsi voi 4nk chunh a thokmi nih hin hmailei ah a ra liangluang te ding hngalh rih lomi pulrai tampi doh ning zong lam a kan hmuhsak lai.
University ah ngandamnak kong chimtu a simi Professor Dr. Davidovitch nih cun, “Thla tlawmpal dan in raikhamsi i chunh nolh lengmang hi a ṭha maw ti cu hohmanh nih kan hngal lo, an hneksak bal lo. Nain a ṭha lai ti ka zum lo,” ati.
