US ram ah MMA aa ṭhua lengmangmi Joshua Van Bawi Thawng nih ChinTube tuahmi ‘2021 Athlete of the Year Award’ a co.
MMA aa ṭhuatnak ah Joshua “The Fearless” Van tiin an auhmi hi atutiang aa ṭhuat fatin a sung bal rih lo.
Tutan laksawng a hmuhmi kong he pehtlai in, “ChinTube le a hramthok tein thazaang aa ka petu nan dihlak chungah kaa lawm tuk,” tiah lunglawmhnak bia a chim.
Zarhpini ah aa ṭhua lai
Joshua cu tu Zarhpini (Dec 19) ah aa ṭhua ṭhan ding asi. Thazaang pek khawh cio i zuam hna usih. Anih hi kum 20 te lawng asi rih caah caanṭha tamtuk a ngei rihmi asi.
Josh cu Hakha peng Ruan khuami Pu Uk Tu le Hniarlawn khuami Pi Ca Zi hna i an fapa asi.
Kum 2013 ah Malaysia in US a phan. 2017 in gym kal ai thok i 2020 December 12 ah avoi 1nk MMA aa ṭhua i teinak a hmu colh. Atutiang ahhin voi 6 aa ṭhua cang i a sung bal rih lo.
Chinmi nih MMA aa ṭhuami zaanglek 2 kan ngeih hna. Tial Cung Thang le Joshua Van Bawi Thawng an si. Tial Cung Thang hi ramkip pumpi MMA i ṭhuatnak ONE Championship tiangah aa ṭhua cangmi asi caah Chinmi nih kan theih ngai. Tial Cung Thang cu ni kum 2020 ahkhan ChinTube nih Athlet of the Year Award a pek cang.
Lai pa tampi cu zuu din in buai le mi velh an ṭhawng ngai nain velh zuamnak taktak a simi MMA ah hohmanh an lut kho lo. Tangka ngahnak zong a si lo pinah midang lungfahnak le thinhunnak a chuahtertu zuu rit in buainak chuahpi le velh a hmangmi Laipa pawl hi a thluak tlamtling komi ahcun a hrut bik an si lai. Puai tuah fatin buainak chuahpi le zohchia in um peng. Khua le ram le miphun min chiattertu an si. Velh an duh taktak ahcun Tial Cung Thang le Josh bantukin MMA ah i ṭhua hna sehlaw mipi nih tha kan pek hna lai, an ngamh ṭung lo ahcun dai ziar hna sehlaw kan miphun caah a ṭha deuh.
Van Bawi Thawng @Josh balte hi cu US ram, Texas state i Houston khuapi lawngah aa ṭhua rihmi asi caah a theimi kan tlawm deuh rih.
Nain, “UFC ah champion pakhat si ding hi kai tinhmi asi,” tiah a chim.
UFC (Ultimate Fighting Championship) cu vawleicung MMA i ṭhuatnak vialte lakah a ngan bikmi asi. ONE Championship nak zongin a ngan deuh.
Josh nih, “UFC ah champion pakhat si ve i ka khuami le ka miphun Laimi caah gym pakhat on i ka miphun mino hna he MMA lei ah ṭhancho ṭi ding hi ka lungthlitum asi,” tiah Lai Kam Thang sinah a chim.
Naite ah Josh aa ṭhuat lio video 2 atang ah zoh khawh an si.
