Kalay: Bethany Sizung ah oxygen dur a puak i Rev. Dr. Lalduhawma le a nupi an nunnak liam

Nizaan 8pm hrawngah Kalaymyo, Tahan sang um Bethany Sizung i mizaw an bunh liomi oxygen dur cu ruah lo piin a puah caah pastor le a nupi an nunnak liam. An fapa zong mei kangh hma a tuar ve.

Bethany Sizung rianṭuan pakhat nih, “Ruah lo piin sizung cungdot in puah thawng kan theih i sizung ningpi in aa hnin dih. Saya pa te an umnak khaan hi special private khaan asi,” tiah a chim.

“An khaan pawngah hohmah an um lo caah aa ning deuh. Saya pa fapa cu ‘kan khamh uh’ tiin tang dot ah a hung ṭum. A pum hmailei acheu hrawng mei nih a kangh,” tiah a chim.

“Nurse pawl nih lungdaihnak sii chunh an timh lio ah amah cu lungfim loin a tlu ve. Wesley Sizung le Matta Specialist Clinic in saya/ma pawl rianrang in an ra i mizaw pawl cu Matta Specialist Clinic ah an ṭhial hna.

“A puakmi ruangah mei zong a meit. Sizung mei seh kan on nain a tlerh dih caah seh a nung kho lo. Sikhan a cungdot cu a ningin a rawk dih. Cungcih le vampang vialte an i baoh dih. Tu zingka ah sang le khrihfabu mino pawl nih sizung thianh a kan bawmh,” ati.

A thimi hi Kalaymyo Evangelical Methodist Church pastor Rev. Dr. Lalduhawma, kum 58 le a nupi Pi Rosiami, kum 65 an si.

A nupi Pi Rosiami cu a damlo caah liamcia ni 4 hrawng khan mah sizung ahhin aa piah an pa le a fapa nih an va umpi mi asi.

Ref: Zalen