Kan hnu zarh chung kha Chin state ah ral a fah tuk caah Chin ralzaam 8,000 hrawng Mizoram ah an phan, tiah kan theih.
Mizoram cozah rianṭuan pawl nih, “Kan hnu zarh a hung phanmi 8,000 he cun Mizoram ah Chin ralzaam 22,000 leng an um cang,” tiah an chim.
Nain, buainak aa rak thokka ahkhan India Rampumpi Cozah nih Myanmar ralzaam luhter lo dingin le a lut ciami zong khirh dih dingin Mizoram cozah nawl a rak pek caah mah lio hrawngah a zaammi tampi cu Mizoram cozah theih lo a thlithup in Mizoram ah an um hna.
Mah pawl he fonh in cun Mizoram ahhin Chin ralzaam 40,000 hrawng kan um cang, tiah Chin Nuhrin Covo Bu (CHRO) nih ramdang media sinah a chim lengmangmi hmuh khawh asi.
Min langhter ngamh lomi Mizoram cozah rianṭuan pakhat nih, “Bawmtu ngeilo ralzaam pawl cu ke in ni tampi chung tupi chung lam chukcho an ṭumkai hnu ah vokkuang lawng in Tiau tiva an tan i Mizoram ah an lut,” tiah a chim.
Mizoram district 6;
- Champhai
- Siaha
- Lawngtlai
- Serhchip
- Hnahthial le
- Saitual lawng hi Chin state he aa rimi an si.
Nain, Chin ralzaam pawl cu Mizoram district dang;
- Aizawl
- Lunglei le
- Khawzawl zongah tampi an phan.
Champhai district ahhin tambik an phan i 8,000 leng an si.
Mizoram ah a zaammi Chin ralzaam lak ahhin MP, ramkhel party member le NUG cozah hruaitu pawl zong an i tel.
