Tanintharyi ramṭhen, Dawei peng, Yebyu khua NLD zung hmai ah minung lutan thlaimi cu uknak firtu Kawl Ralkap nih an hung zoh nain lak loin cutin an kaltak, tiah khuami nih an chim.
Minung lutanmi cu aho lu dah si ti an hngal lo. Mi an i hngilh dih hnu zaanṭim ah a thli tein NLD zung hmai hruang ah aho si hngalh lomi nih an hung thlai.
Tu zingka lawngah khuami nih an hmuh.
Kawl Ralkap nih tu zingka ah an hung zoh nain minung lutanmi cu lak le fimtawl loin an kaltak.
Lutan thlaimi tang ahcun PDF ralkap a simi Dawei Guerrilla Revolutionary Force (GDRF) nih tuahmi bantukin ca an ṭial.
“DGRF nih cun an tuahmi kong thawng an thanh lengmang ko. Mah kong hin cun tu zaanlei 3pm tiangah zei thawng hmanh an thanh lo. Mipi nih DGRF huat hna seh tiin Kawl Ralkap nih an tuahmi si dawh asi,” tiah khuami nih an chim.
October 20 zong ahkhan Tanintharyi ramṭhen Myeik khua ah ummi NLD zung cu aho si hngalh lomi nih bomb in an puah hrawh. October 21 ahcun Dawei khua ah ummi NLD zung bomb an puah i a cim rawk dih.
