Nizaan October 19 mui lai ah Falam in Hakha lei a kalmi Kawl Ralkap tam taktak cu motor 30 hrawng in Ramthlo khua an phan i Baptist biakinn le AG biakinn ah umhmun an khuar.
“SAC ralkap pawl biakinn chungah umhmun an khuarnak aruang cu biakinn ahcun CNF le CDF nih a kan kap lai lo ti an zumh caah asi. An cung bawi pawl hrimhrim nih Chin biakinn ah umhmun khuar dingin nawl an pek hna,” tiah a zaammi SAC ralkap senthum Hin Lian Piang (hmanthlak) nih a phuan.
“SAC ralkap bawi le an cozah zung bawi pawl nih Khrihfa hruaitu pawl an ton hna i mipi le ralkap karlak ah remnak tuah dingin (mipi nih ralkap doh lo dingin) an leem hna.
“Biakinn a rawkmi paoh cu CDF sual phawt dingin an forhfial hna.
“Chin mipi le dothlennak teinak caah Chin khrihfa hruaitu pawl le biakinn hman hi SAC policy asi,” tiah fianghlang tein a chim.
SAC nih anmah himnak le kanmah thahnak caah Chin khrihfa hruaitu pawl le kan biakinn an hmanmi hna hi hohmanh nih kan duh awk asi lo.
Chin khrihfabu hruaitu pawl hi an lungfim ngai a hau. Hakha peng RC upa pawl nih “Father Hrang Tin Thang nih a tonmi Kawl Ralkap bawipa kha RC asi” an ti.
October 18 zongah SAC ralkap pawl cu Thlanrawn khua biakinn ah umhmun an khuar i an chuah lai ah hitin an hrawh ta dih.
October 13 zongah Rialti khua baptist biakinn ciam dihlak in an khangh.
Chin ralkap nih biakinn chung le a pawng ummi SAC ralkap an kah hna lo buin SAC ralkap nih diriam tein kan biakinn an hman hnu ah an hrawh i an khangh dih ṭhiam ko. Cun, biakinn ah an kah hna lo ruangah Hakha lei an lan thluahmah i Chinmi harnak an kan pek chinchin. Hihi Chin khrihfabu hruaitu pawl le CNF kan pale nih an ruah ngai a hau lai.
