Myanmar ralkap nih Kayah state khualipi Loikaw ah vanlawng in bomb tamtuk a thlak caah le Kayah state peng tampi ah ral a fah tuk caah mipi ting 2 deng (170,000 hrawng) an zaam cang, tiah UK hrambunh The Guardian tadinca nih a thanhmi cu NUG cozaah biachimtu Dr. Sasa nih aa share ve.
Loikaw khuapi ah ummi Nan nih, “Zaam dingin thil timhnak caan nazi 1 lawng kan ngei. Ralzaam bawmtu bu nih motor in a kan zaampi,” tiah a chim.
“Dum ka tuahmi zong um, uico le vok ka zuatmi zong an um caah keimah nih cun zaam lo ka duh ko nain zaamlo awk a ṭha lo,” ati.
Kan hnu zarh thokin, Loikaw khua le peng dang ah ral a fak tuk. Myanmar ralkap nih miakpi le vanlawng bomb tiangin voi tampi a kah hna.
Nan nih, “Kan dumhruang pawng bakah bomb a tla i ka tule vialte cu thinphang thather in ihkhun tangah an i thup dih. Bomb thawng cu a than tuk ning hi celh asi lo. Ka pi lebang cu a lau i a thlen chuak dih. A sii kan dinh hnu lawngah a lungdai. Kan inn pawng inn pakhat a khen i rawk dih,” tiah a chim.
UN nih, “Loikaw khuami acheu hrawng cu an inn pawngah bomb tlak caah zaam lo awk an ṭha lo i an zaam dih cang. Kayah state peng dang le khua dang zongin mipi 90,000 hrawng an zaam cang,” ati.
Nain, ramchung media le ramchung ralzaam bawmtu phu pawl nih cun, “Kayah state pumpi ahhin inn le khua a zaam takmi ralzaam 170,000 tluk an um cang,” an ti.
Kayah state cu minung ting 3 dengmang (290,000 hrawng) lawng an si. Mah chungah ting 2 deng ralzaam an si cang ahcun an state mipi a cheu leng (cheuthum-cheuhnih) bak ralzaam an si cang tinak asi.
Kayah mipi nih fak piin Myanmar ralkap duhlonak an langhter i an doh caah ralkap nih fak chiahru in a lehrulh hna. Christmas acu (Dec 24) zong ahkhan Kayah state ah ralkap nih minung 30 leng bak mei in an khangh thah hna.
