Mexico ramri ah a ummi US ram, Texas state i Del Rio khuapi ah Haiti rammi 10,000 leng phungninglo in an hung luh caah Del Rio khuabawi nih “lakhruak poipang dirhmun (state of emergency)” a thanh.
US media tampi nih, “President Biden a ramdang policy hneksaknak asi ko hih….,” tiah an ṭial len.
Mipeem 10,000 leng cu US Ramri Hngak nih an ukmi hmun Del Rio Ramdang Kalnak Hlei (Del Rio International Bridge) tangah tet taktak in an i dil hna, tiah Del Rio khuabawi Bruno Lozano nih a chim.
![](https://thechinexpress.com/wp-content/uploads/2021/09/texas-hlei.jpg)
“Mipeem pawl cu Haiti rammi deuh lawngte an si. Lihnin nih an ram fak tukin hrawh caah le an ram ramkhel a chiat chin lengmang caah US ah um thai dingin a rami an si hna.
“Mipeem cu Nilini zaan tiang ahkhan 10,503 an si cang,” tiah Del Rio khuabawi nih a chim.
Nain, nizaan (Ningani) zong ahkhan minung thong tampi an hung phan chap (mah ca kan ṭial hi Texas ahcun September 18 dei hlan 3am asi). Mipeem pawl cu US Ramri Hngak nih an tawlrel cuahmah hna lio asi.
Joe Biden nih President a ṭuan hnu cun Mexico ramri um Texas state khua tampi ah phungninglo in ramdangmi thong tam taktak dongcat loin an lut peng. Afghanistan ralzaam zong tampi an phan.
![](https://thechinexpress.com/wp-content/uploads/2021/09/Del-Rio-khua.jpg)
“Del Rio khua ah mipeem tam tuk luakchuak an hung luh peng caah ramri hngak pawl an i phanzo ti lo,” tiah khuabawi Lozano nih a chim.
Atutiang ahcun, mah kong ahhin US President Zung White House (Joe Biden) cu zei thei lo bantukin aa umter.
Republican lawng si ti loin Democrats pawl tiang nih, President Biden cu a rannak in mipeem kong hma lak dingin an au cio cang.
![](https://thechinexpress.com/wp-content/uploads/2021/09/texas-mipeem-1024x576.jpg)
July le August thla zong ahkhan ramdangmi ting 2 (200,000) leng bak phungninglo in ramri khua tampi ah an hung lut. Tam deuh cu an khirh hna. Mah cucu liamcia kum 10 chungah mipeem tambik an hung phak asi.