KNU nih Myanmar ralkap 5 a thah hna, ral a fak chin

Karen miphun hriamtlai phu (KNU) le uknak firtu Myanmar ralkap an i tuk ning a fak chinchin.

“Uknak firtu ralkap cozah kan cohlang lo” a titu Karen miphun hriamtlai phu (KNU) ralkapbu 1 hmunhma ah zahan kha Myanmar ralkap he voi 5 an i kap.

“Uknak firtu Myanmar ralkap 5 kan thah hna,” tiah KNU nih a thanh.

“KNU sakhan 1 a kan chuh ve. Myanmar ralkap zong an thi len ve,” tiah Tahdon pengkulh secretary Pado Soe Min nih a chim.

KNU ralkapbu 5 umnak lei khuate pawl zong Myanmar ralkap nih ni fatin miakpi in a kah peng hna caah khuami tampi nunnak kawl in an zaam.

“Liamcia ni 3 zongah uknak firtu Myanmar ralkap nih khuate pawl miakpi in an kah hna caah khuami 500 hrawng nunnak kawl in an zaam,” tiah KNU nih a chim.