Malaysia khualipi Kuala Lumpur cu thaizing kiptuh May 7 in 20 tiang chawhvah phih (MCO or lockdown) asi ṭhan lai, tiah cozah nih tuni ah a thanh.
Malaysia Runvennak Vuanci Datuk Seri Ismail Sabri (hmanthlak) nih, “Ngandamnak Vuanci Zung nih April 1 in 27 tiangah Kuala Lumpur chung hmun 17 ah COVID-19 mizaw tampi kan hmuh hna ati,” tiah MCO tuah an timhnak aruang cu a chim.
“Kuala Lumpur ah ni fatin mizaw an karh peng.
“Kuala Lumpur thil sining ṭha tein kan zohfel hnu ah le Ngandamnak Vuanci Zung nih ruahnak a kan cheuhmi kan ruah dih hnu ah, May 7 in 20 tiang MCO (Movement Control Order) tuah dingin cozah nih bia kan chah.
“Kuala Lumpur ummi vialte nih MCO chungah nan zulh dingmi cu hmasa MCO lio i nan rak zulhmi pawl he khan aa khat dih ko lai.
“Tahchunnak; Kuala Lumpur ummi pawl cu state-dang kal nan ngah lo. State-dang in Kuala Lumpur kal zong a ngah lo. Rianṭuanmi zong na boss nih state-dang kal na herhnak kong ca an ṭialpiak lawngah kal khawh asi lai.
“Rawl dawr a simi; restaurant, rawl mawṭaw, aupah in saikal in rawl zuarmi pawl le lamkam tohmi rawl dawr pawl zong zingka 6am in zaanṭim 12am tiang lawng on khawh si cang lai.
“Rawl dawr pawl ahcun ṭhut in ei a ngah ti lai lo. I-kalpi (take-away siloah bungus) lawng ngah lai,” ati.
Pumh, meeting tuah, cawnpiaknak, tintan, lentecelhnak (bawlung chuh, chinlung, volleyball, tbk) mibu in tuahmi zeihmanh ngah lo.
Kuala Lumpur cu Chin ralzaam bawmtu UNHCR zung, Chin Refugee Comittee (CRC), Alliance of Chin Refugees (ACR) le Falam Refugee Organization (FRO) zung pawl an umnak si pinah Chin Christian Fellowship (CCF), Senthang, Mara, Lautu, Zophei, Zotung, Mie, Lai/Falam Christian Fellowship (LCF), tbk Chin khrihfabu tambik an umnak zong si i Malaysia ah Chinmi kan tambiknak asi.
Chinmi tam taktak kan um rihnak khua pawl; Cheras, Puchong, Klang, Sungai Long, Damansara, Subang, Petaling, tbk Selangor state peng 6 zong May 6 in 17 tiang MCO an tuah dih hna lai. Mah hi hmet law rel khawh asi.
Rel tlolh hlah: Malaysia inn sangbik 3 le vawlei cung inn sangbik pawl
