US ram khuasa tlangval Tawk Za Thang, kum 24 nih bumban dawh (bodybuilding) zuamnak ah laksawng pahnih a kan hmuhpiak.
- Open Lightweight le
- Open Classic Physique Class A aa zuam i a pahnih in laksawng a kan hmuhpiak caah miphun hawi nih nan rak lawmhpi cio lai dah.
Indiana State Championships Men’s Open Lightweight ah pakhatnak laksawng a ngah.
Indiana State Classic Physique Class A ah pahnihnak laksawng a ngah.
Tutan hi avoi 1nk bik aa zuam asi.
Tawk Za Thang, “Avoi 1nak bik ka zuam asi. Phun 2 ah ka zuam i pakhatnak le pahnihnak ka ngah cu kai lungsak ngai ko. Hi nak a sang deuhmi i zuam dingin kai tim rih lai,” tiah a chim.
Anih hi kum 2017 ah Southport High School a dih. Mechanics Engineering in college kum 1 le cheu a kai hnu ah chikhat aa din chung.
Laitlang a chuahkehnak cu Hakha asi. Hakha Khuahlun sangah a rak chuak.
A umnak Indianapolis ahhin bawlung chuih a zuam ngaimi asi nain, kum 2018 ahkhan Legg-Calve-Perthes zawtnak ruangah a kehlei ke operation aa tuah. Mah tluk lentecelh le bawlung chuih a zuammi a ke operation aa tuah cu a lungrawk tuk.
Nain, lungṭhawng in gym hna a kal i a bumban ṭhawnter le ṭawnghter aa zuam. Lungsau tein le ngol lo tein aa zuam peng hnu ah tutan ah bumban dawh zuamnak phun 2 ah aa zuam i a pahnih ningin pakhatnak le pahnihnak laksawng a hmuh hi si.
Zei bantuk harnak kan ton zongah, lungdong lo tein kan i zuam peng ahcun midang tei khawh an si ko ti cu nihin ah Tawk Za Thang nih tatte a kan hmuhsak. Kan dihlak caah zohchun awktlak taktak le lawmhpi phu taktak asi.
A naunu ThaTha Khenglawt nih, “Ka ṭa nih hi vialte harnak a ton buin lung dong lo tein aa zuam i nihin dirhmun tiang a phak cu ka lawmhpi tuk hringhran. Kai uanpi tuk. Hmalei a lamthluan ah Pathian nih umpi ko seh,” tiah aa lawmhnak a chim.
