Mindat-Matupi lam ah ni 5 chung ral aa peh. November 6 le 7, ni 2 chungah CDF-Mindat nih ralhrang 26 an thah hna pinah adang tampi an hliam hna. CDF-Mindat pakhat hliam a tong ve.
November 6 zingka 11:30am ah Mindat-Matupi lam mengtung 31 a hung phanmi ralhrang Kawl Ralkap le CDF-Mindat an i kap.
Khuami le CDF-Mindat an i bawm. Lamkam tikhor le thingkung cung in an bawh hna i naih taktak in puahceh le Lai meithal in an kah hna i ralhrang 8 an thah hna pinah adang tampi an hliam hna.
Ralhrang Kawl Ralkap pawl nih Mindat in Matupi lei an kal pah ah khuami sia an thah ei piak hna i inn vialte an hrawh fir piak dih hna caah khuami an lungfak tuk i CDF-Mindat sinah thatho taktak in ral an doh ve nak hi asi.
![](https://thechinexpress.com/wp-content/uploads/2021/11/253206783_210791854525115_2979215903783807823_n-768x1024.jpg)
November 7 zingka ah mengtung 26 pawngah 9am in 10am tiang CDF-Mindat le hmai ah motor tam nawn in a rami ralhrang pawl an i kap. CDF-Mindat nih an bawh kah hmasa hna i ralhrang 10 bak kataya lam cungah an hrilh thah hna.
Hnulei in motor tampi in a rami ralhrang pawl nih tank, hriamnam ngan le ralkap meithal in ngol loin a kan kah peng caah kan thahmi ralkap 10 hriamnam kan va char kho lo. Kanmah lei minung pakhat a phei ah an khen i hliam a tong ve, nain a nunnak thinphang asi lo, tiah CDF-Mindat nih a chim.
November 7 zaanlei 2:30pm zongah hnu ah a rami kamlo CDF-Mindat paralṭha phu nih mengtung 25 pawngah ralhrang pawl cu naih tein an kah hna. Nazi 2 chung hrawng an i kap. CDF-Mindat nih hriamnam in an kah hna i ralhrang 8 an thih pinah adang ceilak an hliam hna. CDF-Mindat lei cu Pathian dawtnak thawngin hohmanh hliam tong lo tein an i zukphiak kho dih.
![](https://thechinexpress.com/wp-content/uploads/2021/11/252873064_210791907858443_2760907956853820976_n-1024x450.jpg)
Mengtung 31 pawng zongah lamkam ah ralhrang pawl nih palik 1 ruak an phom tami kan hmuh. Ralhrang motor ahhin ralkap lawng si loin palik le meithat zong a i cit tiin kan zumh, tiah CDF-Mindat nih a chim.