Cambodia Prime Minister Hun Sen (hmanthlak) nih tuni ah, “Myanmar ralkap hruaitu he tonbiaruahnak ngei dingin Myanmar ram ah tlawn kai tim. Myanmar ralkap hi ASEAN meeting kaiter ding asi,” tiah a chim.
Uknak firtu Myanmar ralkap cu ASEAN chungtel 10 lakah aa tel vemi asi ko nain mipi a thah lengmang hna caah October thla ah Brunei ram hruainak in tuahmi ASEAN meeting ah kainak nawl an pe lo.
Nain, hmai kum thokin ASEAN Chairman asi ding Cambodia PM Pu Hun Sen nih, “ASEAN chungtel ram 10 ning tein meeting paoh kainak nawl an ngei,” tiah tuni ah a chim.
“ASEAN chungkhar ah aa telmi pei an si cu, meeting kainak nawl an ngeih hrimhrim hau.
“Naypyidaw ah ralbawizik Min Aung Hlaing tong dingin ka tlawng te kho men. Myanmar ram hruaitu he rian ka ṭuanṭi lo ahcun ho he dah ka ṭuanṭi lai?
“ASEAN phungphai hrim ah, ahohmanh nih ASEAN chungtel ram an chuah ṭhawl kho lo.
“Myanmar ralkap Ramdang Vuanci zong Nihnihni ah Cambodia a kan tlawng lai. Keimah zong a rauh hlan ah Naypyidaw ka tlawng kho men,” ati.
