Mah reru cu: Ethiopia vanlawng mong nih ṭumnak aa palh

Thil phor Ethiopia vanlawng cu Zambia ram i an sak cuahmah liopi airport ah a ṭum sual, tiah cozah rianṭuan nih an chim.

Vanlawng cu Zarhpini ahkhan, Zambia ram chaklei Copperbelt ramkulh ah an lim rih lomi airport ah a ṭum.

Zambia lamsul vuanci zung secretary Misheck Lungu nih, “Vanlawng mong nih aa palh caah kan lim rih lomi Copperbelt International Airport ah a ṭumter sual,” tiah a chim.

“Ṭum a timh lio ah radar in an i chawn ko hna nain ‘kan in hmu kho lo’ an ti.

“Mah ruangah, amah tein aa zoh i ka hi si ko hih tiin a ṭumter cu kan sak liomi airport ah a ṭum diam.

“Zeihmanh a rawkmi cu um lo. Thil sining tling deuh ṭuanvo ngeitu nih an hlat lio asi.

“Hnu ah, vanlawng cu a mongtu nih a ṭumnak ding airport ah a va zuanpi ṭhan,” ati.

China nih a sakmi Copperbelt International Airport cu kum 2020 tanṭim ahkhan lim ding an rak ti nain pulrai ruangah an lim kho rih lo.

Ethiopian Airlines company cu thil phorh awk tampi a ngeih caah pulrai chung vialte kha an sipuaizi a tla lo. Africa leiṭhen ah thil phor vanlawng company nganbik asi. A khualtlawng vanlawng tampi zong thil phor vanlawng ah a thlen viar hna. — AFP