Malaysia ram ah rianṭuan ṭimi Myanmar rammi pawl an i vel hna i minung 1 an thah. Palik nih Myanmar pa panga (5) an tlaih hna.
Johor state, Kulai khua ah rian a ṭuan ṭimi le sehzung rianṭuan pawl umnak inn ah a um ṭimi an si.
Christmas thaizing December 26 ah zuu an din hnu ah bia elnak a chuak i an i vel that.
Rianṭuan pawl umnak inn ah um vemi pakhat nih an supervisor phone a chawnh i ‘an i vel’ tiin a chimh.
Supervisor pa a hung phak ahcun a thi cangmi Myanmar ruak lawng a hmuh. A thattu pawl cu an zaam dih cang. Aruak cu a ṭhut in an rak ṭhut ter. Pawngkam ah thisen aa dil dih.
A ṭaang ah nam sawhnak hma 4 a um. Aruak cu Sultanah Aminah Hospital sizung ah thihnak certificate tuah dingin an kuat.
Palik nih an kawl hna i December 27 ah Johor Baru le Melaka ah lunghrinhmi Myanmar pa panga (5) an tlaih hna.
Kulai peng palik bawizik nih, “Kan tlaihmi Myanmar rammi 5 hi thah a tongmi pa he zuu a ding ṭimi an si caah anmah hi lainawng an si lai ti lunghrinh in kan tlaih hna,” tiah a chim.
“Lainawng Upadi Dal 302 in hlathlainak kan tuah lio asi. January 2 tiang hlathlainak kan tuah hnu ah biaceihzung ah chuahpi an si te lai,” ati.
Lainawng Upadi Dal 302 cu ‘mi a thattu cu cozah nih thah ve ding’ timi upadi asi.
An thahmi Myanmar pa cu kum 25 asi. A thattu tiin lunghrinhmi a rammi pawl cu kum 20 in 43 kar an si hna.
An sawhnak si men lai tiah zumhmi namte pakhat zong ruak pawngah palik nih an hmuh.
