Malaysia ah ni 3 chung COVID-19 mizaw 6,000 leng an hmuh cang hna

,

Malaysia ah COVID-19 zawtnak a karh tuk hringhran. A pehpeh in ni 3 chung bak mizaw 6,000 leng peng an hmuh cang hna.

Ngandamnak Vuanci Zung sibawi Dr Noor Hisham Abdullah nih, “Tuni ah mizaw 6,493 kan hmuh hna. Ni kum ah zawtnak aa thokka in nihin tiang mizaw hmuhmi dihlak 498,795 an si cang,” tiah tuni ah a thanh.

Selangor state ah mizaw an tam cem i 2,163 an si. Malaysia ah minung tambiknak state asi bang Chinmi zong tam taktak kan umnak asi.

A changtu ah Kuala Lumpur (641) le Sarawak (612) an si.

“Mizaw aza leng hmuhnak state dang pawl cu; Kelantan (467), Kedah (434), Perak (382), Negeri Sembilan (370), Penang (302), Melaka (165), Pahang (161), Sabah (144) le Terengganu (139) an si.

“Labuan ah 84 le Putrajaya ah 20 kan hmuh ve hna,” tiah social media in a thanh.

Nithumni kha mizaw 6,075 an hmuh hna i nizaan kha 6,806 an hmuh hna.

Zawtnak a karh tuk caah rampumpi ‘full lockdown’ tuah a hau kho men tiah mi tampi thinphang in an um.

Full lockdown tuah/lo kong cu tuzaan ah ram hruaitu Prime Minister Muhyiddin Yassin nih thawng a thanh lai, tiah Malaysia media pawl nih an tial. A thanh ahcun kan ṭial colh ve te lai.