Malaysia Ramdang Vuanci Zung nih, “Yangon um Malaysia Tanzung lutlai nih Myanmar ralkap cozah a tonmi cu cozah taktak asi tiin kan cohlan caah asi lo,” tiah a chim.
Nizaan tihni, Nithumni ahkhan Malaysia Myanmar Palai (Yangon um Malaysia Tanzung lutlai) Datuk Zahairi Baharim le Myanmar ralkap cozah Lekṭhik Vuanci U Aung Than Oo meṭing an tuah, cucaah democracy duhtu Myanmar mipi nih “Malaysia cozah nih pei ralkap cozah a cohlan hi” tiah fak piin lungtlinlonak an chim.
Phungninglo Myanmar ralkap cozah tadinca nih, “Malaysia Cozah Palai le Lekṭhik Vuanci U Aung Than Oo cu ram 2 kar lekṭhik lei sipuaizi tuah ṭi dingin bia an i ruah,” tiah a thanh.
Mipi nih an soisel tuk hnu ah, Malaysia Ramdang Vuanci Zung nih, “An i tonmi cu Malaysia company Petronas nih Myanmar ukmi Andaman Rili um Yetagun gas dawpnak ngol chung dingin bia a khiahmi kong a va chimhmi si,” tiah a thanh.
April thla thok ahkhan, Petronas he aa pehtlaimi PC Myanmar timi Hong Kong (China) company nih Myanmar ram Andaman Rili ah ‘Yetagun’ ti min bunh in gas dawpnak a tuahmi cu gas a zut i “kanmah nih ṭuanvo kan la lai lo (force majeure)” tiin bia a khiah.
Malaysia Ramdang Vuanci Zung nih, “Ralkap cozah kan tonmi cu, State Administrative Council (SAC) hi Myanmar cozah asi tiin kan cohlan tinak asi lo,” ati. SAC cu ralkap bawizik Min Aung Hlaing nih uknak a fir hnu ah cozah a dirhmi min asi.
“Myanmar cungah Malaysia kan lungput cu a fiang in aa khat peng ko.
“A rannak in buainak donghter dingin le buainak um lo tein Myanmar mipi duh ningin thlennak tuah dingin tlaihmi vialte thlah dih i kap hnih biaruahnak tuah dingin kan forhfial pengmi asi.
“Malaysia cu a dihdongh tiang kap hnih (NLD le ralkap) he ningcang tein kan i pehtlai lai,” ati.
ASEAN ah aa tel vemi Malaysia nih cun ASEAN chungtel ram pawl cu Myanmar buainak kongah i thlak deuh dingin a forhfial pah lengmang hna. Naite zongah, Malaysia le Brunei nih Myanmar buainak kong Jakarta (Indonesia khualipi) ah ASEAN chungtel ram pawl meeting tuah dingin thawng an thanh.
