Malaysia ram ah Covid-19 zawtnak a karh chin lengmang caah January 13 (Nithumni) zaantim in January 26 tiang state tampi ah lockdown (MCO) an tuah lai.
Mah kong cu Malaysia ram hruaitu PM Tan Sri Pu Muhyiddin Yassin nih tuni (January 11) ah TV in thawng a thanh.
“Lockdown (MCO) cu Kuala Lumpur, Selangor, Penang, Putrajaya, Labuan, Melaka, Johor le Sabah ah kan tuah lai.
“Cun; Pahang, Perak, Negri Sembilan, Kedah, Terengganu le Kelantan state pawl zongah CMCO (partial lockdown) kan tuah lai.
“Perlis le Sarawak zong RMCO kan tuah lai,” tiah PM Pu Muhyiddin nih a thanh.
Cucaah; pumh, lentecelh, meeting tuah le mibu um khap dih an si lai.
Biakinn vialte, company le zung vialte khar dih an si lai.
Cucaah, Malaysia um Chinmi tampi rian an ṭuan kho lai lo i tangka an harsa ṭhan lai.
Nitin herhhai tirawl a zuarmi supermarkets, eidin dawr, 7-eleven/KK tibantuk dawr lawng an on lai.
Tu lio Covid-19 mizaw tambik an hmuhnak hi sehzung rianttuan ramdangmi sin in a si.
Malaysia ram ah zawtnak aa thokka in tutiang ah zawtnak ngei hmuhmi dihlak 135,000 an si cang. Liamcia ni tlawmpal chung cu nifatin mizaw thar 2,000 leng peng an hmuh hna.
Ngandamnak Vuanci Zung nih, “Atu ning tein mizaw an karh ahcun March thla cun nifatin mizaw 8,000 peng an phan kho” ati caah tu bantuk in lockdown tuah an timh hi a si.
