Zahan zaan ah Malaysia Lahwahkah Zung nih Pudu sang um inn (apartment) ah tlaihkhihnak a tuah i ramdangmi 205 a tlaih hna.
Kuala Lumpur Lahwahkah Zung director Hamidi Adam nih, “Malaysia rammi nih report an kan tuah i zahan zaan sml 11:30pm hrawng ah ramdangmi tampi an umnak inn ah tlaihkhihnak kan tuah,” tiah a chim.
Ramdangmi tlaihkhihnak ahhin Lahwahkah Zung rianttuan officer le palek an i tel.
“Hika inn ahhin ramdangmi 425 an um i cu chungah pa 203 le nu 2 cu visa thih hnu tiang a ummi le phungninglo in a ummi an si hna ruangah kan tlaih hna.

“Lahwahkah Upadi ningin tawlrel an si lai,” tiah Hamidi Adam nih a chim.
An tlaihmi pawl cu kum 20 in kum 49 kar an si hna i Bangladesh, Indonesia, Myanmar le Nepal rammi an si.
A tam deuh cu cuka hmun pawng ah a ummi innsak nak hmun ah rianttuanmi an si.
“Malaysia rammi nih an kan chimhnak ahcun inn khan pakhat ah ramdangmi a bubu in an um an ti nain khan khat ah minung 2, 3 lawng an um kan hmuh,” tiah Hamidi nih a chimchap.
Tlaihmi pawl cu tlamtling deuh in check dingin Lahwahkah thong ah an kal pi hna. – Bernama