Malaysia khualipi Kuala Lumpur cu tilian ruangah atu mah ca kan ṭial lio tiang ahhin motor lam tampi an khar.
Nizaan tilian nih motor lam tampi thin tiangin a khuh dih. Atu hi ruahpi a han i tilian cu a kao cang nain lam cungah hnawm an khah dih caah motor le saikal kalnak caah ṭihnung tuk an si.
![](https://thechinexpress.com/wp-content/uploads/2021/12/267667041_4601579793211045_1965322246527724831_n.jpg)
Cucaah motor lam tampi cu an khar i cozah rianṭuan pawl nih namchang in an thianh cuahmah hna lio asi.
Kuala Lumpur khua, Jalan Ipoh sangah zong tilian fak tukin a tlung i Hriphi khuami inn tampi ah ti a lut dih. Hriphi biakinn zong ti nih a phum dih i biakinnn seh thilri le fale cacawnnak sianginn thilri tangka thong tampi man an rawk sung dih.
![](https://thechinexpress.com/wp-content/uploads/2021/12/268863914_3000076953585991_8863263266415326681_n-452x1024.jpg)
Atutiang khar rihmi motor lam pawl cu;
- Jalan Tuanku Sultan Abdul Halim
- Jalan Rahmat
- Jalan Sentul Manis
- Jaalan Pahang Baarat le
- Smart Tunnel hna an si.
Khua hriang in khua lai kal a duhmi paoh cu lam hla deuh a simi Jalan Tun Razak lei in an kuaih ter dih hna.
![](https://thechinexpress.com/wp-content/uploads/2021/12/269407493_1097826264304718_7464356772136432329_n-768x1024.jpg)
“Motor le saikal aa citmi pawl nih lam kan kharmi hi pah chih lo tein nawl ngai uh. Mah lo cun lam tanṭim ah nan i tap lai i hohmanh kan rian hma a kal kho lai lo,” tiah lam bawi nih a chim.
Nizaan tihni chun hnu in nizaan zaanṭim tiang dong loin ruahpi a sur caah atu bantukin tiva an liam dih i khua chungah tilian a tlunnak hi si.
![](https://thechinexpress.com/wp-content/uploads/2021/12/269596791_282588663907860_6143749325166018873_n.jpg)
Tuni cu nikhua a ṭha tuk cang, a linh zong a lin pah ngai 28 degree celcius asi. Nain tu zaan muika hrawngin nikhua a chia lai i ruahpi a sur lai, tiah Nikhua Zung nih a thanh.