Caankarlak Ram Hruaitu Pu Muhyiddin Yassin nih, “Lockdown fak bikin tuahmi state pawl zongah raikhamsi tling tein aa chun cangmi pawl cu thaizing August 20 thokin restaurant ah rawl ei le khat le khat i hnor hau lomi lentecelh a ngah cang lai,” tiah tunai ah thawngthanh.
Chinmi tambik kan umnak Kuala Lumpur le Selangor hi lockdown fak bikin tuahmi ah an i tel ve.
“Tuni ah Ram Himnak Phu (NSC) meeting kan tuah i atu bantukin bia kan chah hi asi.
“Zulhphung kan dorhmi hi COVID-19 raikhamsi tling tein aa chun cangmi ca lawngah asi lai.
“Hitin bia kan chahnak aruang cu, rampumpi ah kum tling acheu leng raikhamsi kan chunh cang hna caah asi.
“Hmasa ahcun August 31 ah rampumpi ah kum tling acheu tal raikhamsi chunh dih dingin kan i tinh nain kan i ruahning lengin kan rang deuh.
“Mah pinah; Labuan, Sarawak, Negri Sembilan, KL, Selangor le Putrajaya ah minung tam tuk raikhamsi kan chunh cangmi hna zong kan ruah dih hnu ah atu bantukin bia kan chahnak hi asi,” ati.
Tuni hi Malaysia rampumpi ah COVID-19 zawtnak ngei thong 23 dengmang (22,948) an hmuh hna. Tambik an hmuh hna ni asi. Zawtnak ngei hmuhmi dihlak ting 15 deng an si cang. Mah chungah ting 12 leng an dam cang. Tuni lawngah thong 22 deng an dam.
Tuni ah 178 an thi, a thimi dihlak thong 13 le cheu dengmang an si cang.
