Malaysia khualipi Kuala Lumpur Sizung (Hospital Kuala Lumpur – HKL) cu COVID-19 mizaw an i tlum lo caan a um lengmang i ṭuang bakah an thlop hna caan a tampi.
Ṭuang ah COVID-19 mizaw pakhat an thlop lio hmanthlak cu social media ah an tar i Malaysia rammi vialte an lau dih i linsa tukin an ceih cio.
Cucaah, Hospital Kuala Lumpur lutlai Dr Heric Corray nih tuni ah zapi sinah thil sining fianternak a tuah.
![](https://thechinexpress.com/wp-content/uploads/2021/07/patient_cpr_floor_20210703.jpg)
“Ṭuang ah kan thlopmi mizaw kha Emergency Department ah lungfim loin an hung phakpi mi si. A thaw chuah ti lo pinah a thi zong kal ti lo.
“Mah lio ahkhan mizaw ihkhun pakhat hmanh a lawng lo, mizaw an khat dih. A ṭaang nam in thaw pek (CPR) a hau fawn, ihkhun nih le um ti lo caah a rannak in ṭuang ah kan thlopmi asi,” tiah Dr Corray nih a chim.
“Nain, mizaw cu kan khamh kho lo, a nunnak liam.
“A ruak cu HKL Ruak Checknak Zung ah kan kuat cang,” ati.
![](https://thechinexpress.com/wp-content/uploads/2021/07/patient_cpr_floor_20210703_2-473x1024.jpg)
Hospital Kuala Lumpur (HKL) sizung ṭuangah mizaw dang pakhat an thlop ve lio hmanthlak zong July 1 ah Twitter ah an tar i mi tampi an tuksum. Mah kong zong cu Dr Corray nih a fianter.
“Mah mizaw kha Emergency Department ah an hung phakpi mi asi. A hnuhdawh caah ihkhun ah chiah ahcun a tla ding si.
“A rannak in thlop a haumi si fawn caah rianrang in ṭuang ah kan thlopnak asi. A cuap ah a cil luhnak hnga lo a sir in kan ihtermi asi,” ati.
HKL sizung cu rianrang in thlop haumi COVID-19 mizaw an tamtuk caah December thla thok khan hlai (surgery/operation tuah) a haumi mizaw pawl zong hnu deuh ah tuah dingin an thawn dih hna.
Kuala Lumpur le Selangor state cu Malaysia ah COVID-19 mizaw an tambiknak le fak bikin chawhvah an khap (lockdown tuah) nak hmun zong an si.
![](https://thechinexpress.com/wp-content/uploads/2021/07/208062642_10158032465901237_1438259214117522600_n-1024x1024.jpg)