Lockdown zarh 2 chungah Lahwahkah nih phungninglo ramdangmi tlaihkhihnak a tuah lai, tiah Lahwahkah uktu Ramchung Vuanci Pu Hamzah Zainudin nih a chim.
“Tlaihkhihnak cu Lahwahkah, Hmetpungtin Zung le palek nih an tuah lai. Tlaihmi pawl thongthlaknak ding camp (detention centre) cu Thonginn Zung nih a timhcia dih cang.
“Hmasa ahcun thonginn ah thongtla an khat dih tak ko. Nain, atu cu a lawngmi tamtuk cang. Tlaih dingmi pawl chiahnak thonginn le camp kan timh cang hna.
“Covid-19 zulhphung (SOP) le lockdown (MCO) kan tuahnak kum 1 leng a si cang.
“Atutiang ah a zul lomi, a lungkhongmi ramdangmi an um rih ahcun kan tlaih dih hna lai,” tiah thawngla pawl a chimh hna.
“Lockdown chungah Covid-19 zulhphung a zul lomi kawl dingin palek 55,000 kan thlah hna lai. Atu lio hi palek 37,000 lawng kan thlah hna, 18,000 kan chap lai.
“Ramchung Vuanci Zung tang zung kip rianttuan 15,000 zong kan thlah rih hna lai caah Covid-19 zulhphung a zul lomi kawltu dihlak 70,000 an si lai.
“Lockdown chung cu rampumpi hmun 800 leng ah lam kan kham/block lai. Atu lio hi cu hmun 600 dengmang lawng lam block a si.
“Zatlang hmunhma le rianttuannak hmun zong ah Covid-19 zulhphung an zulh/lo ruah lo piin checknak kan tuah lengmang lai. Vuanci Zung dang le khua cozah he i bawm in kan tuah lai.
“Covid-19 zulhphung a zul lomi paoh cu tlaih in biaceihzung ah chuahpi dih an si lai. Biaceihzung nih nan caah dantatnak a khiah lai,” tiah a chimchap. – FMT
