Malaysia cozah nih a tlaih Myanmar rammi 1,200 cu Myanmar ralkap sinah ap a timh hna. Anmah laknak caah Myanmar ralkap nih ralkap tilawng 3 a rung thlah.
Mah chungah a tlawmbik minung 9 hi Chin refugee an si, tiah Kuala Lumpur um Alliance of Chin Refugee (ACR) Chairman James Bawi Thang Bik nih a chim.
“Chinmi 9 cu Rakhine le Paletwa peng ral ruangah Malaysia ah a rung zammi an si. UNHCR nih a ton rih hna lo ruangah UNHCR card an ngei lo.
“UNHCR an ton khawh hlan ah palek tlaih an tong. Mah ruang cun Malaysia cozah Myanmar ralkap sin a ap hna hlan ah UNHCR nih a ton hrim hna hau,” ati.
Malaysia Lahwahkah bawizik nih, “Myanmar ralkap sin ap kan timhmi hna lakah UNHCR card ngeimi le Rohingya miphun an i tel lo,” tiah a chim.
Nain UNHCR nih, “kum 2019 August thla in nihin tiang Malaysia cozah nih a tlaihmi pawl hi refugee le asylum an i tel/lo tonnak nawl a kan pe lo,” tiah a chim.
James Bawi Thang Bik nih, “thla fatin tlaih a tongmi min cazin cu UNHCR sinah kan kuat peng i UNHCR zong nih a hngalh ko.
“Nain UNHCR nih 2019 August thla thokin atutiang lahwahkah thong/camp ah cozah nih luhnak nawl a kan pek lo caah zeihmanh kan tuah kho lo, tiin a kan leh peng,” tiah a chim.
