Malaysia ram hruaitu Prime Minister Pu Muhyiddin Yassin nih, “COVID-19 raikhamsi voi 2 aa chun cangmi pawl caah COVID-19 zulhphung SOP dorh/lo cu hmai zarh meeting ah bia kan chah lai,” tiah a chim.
“Raikhamsi voi 2 aa chun cangmi pawl cu an zalong deuh cang sehlaw a ṭha hnga lo maw timi biatung an dirh caah hmai zarh meeting ah ceih kan timh hi asi.
“Hmai zarh ah meeting kan tuah khawh hnu ah, voi 2 aa chun cangmi pawl caah zulhphung (SOP) kan dorhmi dikthlir cu kan thanh te lai.
“Voi 2 tling tein aa chun cangmi cu lockdown zulhphung nih a hren peng ve hna awk asi ti lo. Voi 2 aa chun rih lomi nakin an zalon deuh awk asi,” tiah sii company Pharmaniaga LifeScience Sdn Bhd ah a kal lio tuni ah a chim.
“Zeitin dah zulhphung kan dorh piak hna lai ti cu … peng dang kal zong kan onh khawh men hna, dawr ah thil cawk (shopping kal) zong kan onh khawh men hna.
“Atu lio cu Klang Valley (Kuala Lumpur le Selangor) ah COVID-19 zawtnak a karh tuk caah zawtnak a zor zokzok nakhna hika hmun ummi pawl a rannak in raikhamsi chunh hi cozah nih usa kan pekmi asi.
“Kuala Lumpur le Selangor ummi vialte a rannak in raikhamsi chunh viar hna dingin chunhnak hmun tampi chap le chuntu minung tampi chap kan i zuam cuahmah.
“Hika hmun ummi pawl chunh awk raikhamsi ting 30 (3 million) kan ngei cang. A ra laimi zarh 2 silole zarh 3 hrawng ahcun zawtnak zor zokzok sehlaw zapi caah lockdown zong dorh kho usih ti kan duh.
“Sinain, mipi nih COVID-19 zulhphung hi felfai tein an zulh peng a hau rih. Mah lo cun zawtnak a zor kho lai lo,” ati.
