Malaysia ram hruaitu Prime Minister (PM) Pu Muhyiddin Yassin, kum 74 cu hmasa a ṭanpitu UMNO party MP 8 nih ‘kan duh ti lo’ an ti caah phuah/lo September thla Hluttaw meeting ah vote an thlak lai.
Malaysia Hluttaw Niam (Dewan Rakyat) ahhin MP 220 an um. Acheu fai 112 nih an duh lawngah PM ṭuan khawh asi. September thla Hluttaw meeting ah MP 220 nih vote an thlak lai i a tlawmbik 112 tal nih an duh lo ahcun an phuah lai.
Hmasa a ṭanpitu UMNO party MP 8 nih ‘kan duh ti lo’ tiin siangpahrang “Yang di-Pertuan Agong Al-Sultan Abdullah Ri’ayatuddin Al-Mustafa Billah Shah” sinah thawng an thanh caah Siangpahrang nih PM Muhyiddin Yassin cu tu zingka 11am ah a auh i “nai phuak lai maw?” tiah a hal.
MP (Member of Perliament/Hluttaw Palai). PM (Prime Minister/Rampumpi Vuancichoh asiloah Rampumpi Cozah Hruaitu).
PM nih, “Kai phuak rih lai lo. MP tam deuh nih an ka duh/lo fehternak caah September thla tuah ding Hluttaw meeting ah MP vialte vote (Vote of Confidence) kan thlakter hmasa hna lai. Mah hnu lawngah ṭuan dingah kai tlak/lo cu phunghram ning tein bia khiah khawh asi lai,” tiin a leh i siangpahrang zong a lungtling.
An phuah ahcun Hluttaw Niam MP tambik nih an duhmi MP pakhat kha siangpahrang nih PM (Prime Minister) rian a pek lai i amah nih cun a chan lai.
Pu Muhyiddin Yassin hi ni kum March 1 in Prime Minister a ṭuanmi, a ṭuannak kum 1 fai lawng asi rih.
Tu zaanlei ah “PM ṭuan dingin MP tam deuh nih an ka duh/lo cu September thla Hluttaw meeting ah Hluttaw Niam MP dihlak nih vote an thlak lai…” tiin thawng a thanh lio video atang ah zoh khawh asi.
Mah hlan cu cozah cu punghman in rian kan ṭuan ko lai, ahlei in COVID-19 dotu Ngandamnak Vuanci Zung cu punghman in an ṭuan ko lai, ati.
