Malaysia ram hruaitu PM Muhyiddin Yassin nih thaizing August 16 ah siangpahrang (Yang di-pertuan Agong) sinah a rian in aa phuahnak ca a pek lai, tiah cozah media Malaysiakini nih tuni ah a thanh.
PM Muhyiddin Yassin le a party Bersatu hruaitu pawl cu tu zingka ah meeting an tuah i ‘thaizing ah ka rian in i phuak/din dingin kai sungphiat cang’ tiah a chimh hna.
“PM nih a rian in i phuak lo dingin a tuah khawhmi paoh a tuah dih ko nain asi khawh ti lo caah thaizing ah i phuak dingin ai sungphiat hi asi,” tiah PM Zung Vuanci Mohd Redzuan nih a chim.
Fianternak: Amah party Bersatu nih cozah tlaihnak caah a herhmi MP 112 an tlinh lo caah UMNO party he i bawm in ‘ṭangṭi cozah (coalition government)‘ an tlaih. Atu ah UMNO party MP pawl nih ‘kan in duh ti lo, na lei kan ṭang ti lo’ an ti caah cozah tlaihnak caah a herhmi MP an tling ti lo i PM a ṭuan kho ding si ti lo. Liamcia ni tlawmpal chung kha party dang MP pawl aa sawm len hna nain an tlin khawh hlei lo caah thaizing ah phuah aa timh hi si.
“Atu hi meeting kan dih bak asi. Thaizing ah cozah phu meeting kan tuah lai. A dih cangka in Siangpahrang Inn ah a kal lai i a rian in aa phuahnak ca a ap lai.
“Thaizing ah amah PM pumpak nih thawngthanhnak zong a ngei te lai.
“Phunghram ningin rianṭuanmi kan si. UMNO nih Malaysia usa pek loin anmah pumpak duhnak tu usa an pek hi cu apoi ngai. Pu Muhyiddin Yassin an ṭanpi ti lo ahcun phunghram ning tein an tuah awk asi.
“Atu cu Malaysia ram le mipi zawn a ruatmi nih ram a hruai lai/lo cu siangpahrang kut cungah a um cang,” ati.