MALAYSIA _ Cheukhat nih sianginn on lai a si tiah an fale herhmi cauk le angki cawk in an i timhlamh lulh lioah tampi nih an fale sianginn kaiter ding le kaiter lo ding an i fiang kho lo, an ṭihṭanh.
Sabah, Kudat um Clarice Gousi nu hi a fiang rih lomi, a ṭihṭanhmi lakah pakhat cu a si. A fale sianginn kai le kai lo ding ai fiang dih lo nain thilri cawk in timhlamhnak cu a ngei ṭhiam.
“Caan saupi i timhlamhnak a um caah kai lawm ngai, ka fale caah kut thuh le hmurkâ huhnak ka timhlamh lio si,” a ti. Asinain a lungretheih-ṭihṭanhnak kha a langhter ṭhiam.
Vie Gilbert nih, “Kum khatnak a si dingmi ka fanute nih hawi thar ser lai ai hngahhlang tuk, ai ngaih tuk nain zulhphung kha ṭhate in an zul kho hnga maw tiah ka lungrethei,” a ti.
“Asinain, siangcachim hna he kan umnak WhatsApp group kan ngei i ka hnangam ko a ti.”
Azlina Abdullah nih, “Sianginn on a si lai i, a hmunhma bakah ka fale nih ṭhate in cawnpiak an si lai a ti ve. Online cawnpiakmi ingsa cu an zoh huaha lo, cawnpiaktu kha an ṭih deuh hna i, chimh an ngai deuh lai,” a ti.
Kum 10 le 12 fa a ngeimi Reena bel nih takpum in sianginn va kai/kal a duh lonak kha a chim ve. Case a karh cuahmah lioah ka fale him-damnak zawn ka ruat a ti.
National Union Teaching Professions secretary-general Harry Tan nih nulepa le siangcachim an ṭanṭi awk a si; ahleiin online cawnmi i an fel lonak kongah a ti.
An herhmi thilri kha an i pekchanh awk a si, record-mi video zong an i kuat awk a si a ti. Pulrai nih sianginn cawnnak a hrawh caah inn cawnnak lam ṭha kan kawlpiak hna awk a si a ti.
THE STAR (Jan. 7)
