Malaysia um refugee pawl zong raikhamsi chunh an si ve ko lai. CanSino raikhamsi chunh an si lai, tiah Malaysia cozah nih a thanh.
Malaysia Rampumpi COVID-19 Raikhamsi Chunhnak Vuanci Pu Khairy Jamaluddin (hmanthlak chung angki raang) nih, “CanSino raikhamsi cu hmai thla ah a phan lai,” tiah a chim.
“CanSino raikhamsi cu voi 1 lawng chunh haumi si caah ralzaam chunh awk ah aa tlak deuh.
“Ralzaam pawl cu voi 1 lawng chunh a haumi raikhamsi chunh ah a fawi deuh. Ralzaam pawl cu cozah nih ton an fawi lo caah voi 2 chunh haumi raikhamsi chunh cu a har ngai,” tiah June 21 ah Bukit Jalil Certual i raikhamsi chunhnak hmun ah media pawl a chimh hna.
Voi 1 lawng chunh a haumi China ser CanSino le US company Johnson & Johnson sermi raikhamsi cu Malaysia cozah nih poipang lakhruak ton ahcun thil sining hoih in hman dingin a cohlan hna.
Pu Khairy nih, “Raikhamsi chunh hi cozah nih usa kan pekmi asi, cun ralzaam pawl zong chunh ve hna ding hi 2nk usa kan pekmi si,” ati.
Nizaan ah Malaysia Nuhrin Covo Bu (Suhakam) nih, “Ralzaam pawl hi COVID-19 raikhamsi chun ve hna,” tiin cozah a hal.
“Raikhamsi na chunh hna tikah tlai hna hlah,” ati.
Atu hi Malaysia rammi pawl cu raikhamsi an chunh cuahmah hna liopi asi. Voi 2 chunh a haumi China ser Sinovac le US ser Pfizer le UK ser AstraZeneca an chunh hna.
Atutiangah an rammi ting 40 (4 million) hrawng cu voi 1 cio an chunh cang hna. Voi 2 tling tein chunh cangmi 1.6 million hrawng an si. Malaysia rammi dihlak cu 32 million an si, nain kum 11 tang ngakchia cu chunh an si lo.
