Uknak chuttu ralkap cozah kan duhlo tiin Mandalay ah sandahpiahmi pawl cu tu zingka ah ralkap nih mawṭaw in an pah hna i minung 11 an tlaih hna.
Mandalay, Chanmyathazi pengah sandahpiah an thok ka 8:15am hrawngah palek le ralkap mawṭaw 7 an hung phan i hmaisuang sandahpiahtu pakhat cu mawṭaw in an pah hramhram hnu ah khairiat meithal kuan le mitthli tlaknak bom in an kah hna, tiah sandahpiah vemi siangngakchia pakhat nih a chim.
“Mawṭaw in an pahmi cu hliam a tong. Adang cu hliam tongmi an um lo,” ati.
Tlaih tongmi 11 lakah 4 cu nu an si.
Mandalay cu; Rampumpi Siangngakchia Bu, Lothlo Bu, B.E.H.S No.7 siangngakchia, saya/ma, tbk in bu kip i fonh in ni fatin ralkap duhlonak an langhter peng.
Zahan zingka zongah, Mandalay 66 le 40 lam ah saikal cit buin ralkap duhlonak an langhter i ralkap nih mawṭaw pah in an dawi hna. Hliam tong le tlaih tong konglam fiang in theih khawh asi rih lo.
April 15 zongah, Mandalay khuate ngandamnak rianṭuan pawl nih duhlonak an langhter i ralkap nih an dawi hna i minung 16 leng an tlaih hna.
Mandalay ahcun chun ah sandahpiahmi meithal in an kah hna pinah, zaan zongah mipi umnak sang pawl ah ralkap nih meithal puah in an tlerh peng hna, inn chung lut in an tlaih peng hna.
Cutin ralkap nih chun he zaan he an tlerh hrem peng hna nain Mandalay mipi cu chun he zaan he duhlonak an langhter peng rih ko. — Myanmar Now
