May 13, zaanlei sml 5:00pm hrawng ah Matupi khua, Sanbaung sang, Hakha lei kalnak lam ah ralkap nih Salai He Za Ki San an tlaih.
Salai He Za Ki San cu kum 18 tling rih lomi a si.
“Zaanlei sml 5:00pm hrawng ah an tlaih. Hakha lei kalnak lam pawngah a si. Kum 18 a tling rih lo. University kum 1nak hmanh a dih rih lo.
“Atu hi palek sakhan ah an chiah. Zahan zaan cu sakhan chung mihrennak ah an chiah i tu zingka lawngah a kum tlin rih lo caah an ti i a leng ah an chuah tthan. Palek sakhan vuang chung ahcun a um rih ko. Tu chun ah a kongceih le biahal an timh,” tiah Matupi khuami pakhat nih a chim.
Salai cu zeiruangah ahdah ralkap nih an tlaih ti hngalh a si rih lo. An tlaih lio ahhin an tukvelh tiah kan theih.
Ralkap nih uknak a lak hnu in Matupi khua luhchuahnak pawl ah ralkap le palek nih zalong tein luhchuahnak an phih i mitlaih le tukvelh tampi an tuah.
Cun bantuk in, Matupi khua ah April 7 le 8 ah ralkap nih rak tlaihmi mino 5 cu voi 3 tiang biaceihzung ah chuahpi an si cang nain zei a hleih lo pinah May 19 ah biaceihzung ah chuahpi tthan an timh hna.
Tuni zongah Hakha ah duhlonak lamzawh mi ralkap nih a tlawm bik minung 3 an tlaih hna tiah kan theih. – Khonumthung
