ASEAN meeting kai dingin Indonesia tlawn aa timmi Min Aung Hlaing cu ‘ramleng a chuah cangka in UN nih tlai uh’ tiah Global Center for R2P hruaitu Simon Adams nih forhfialnak bia a chim.
“Miphun cihmihnak a tuahmi ruangah UN biaceihzung ah chuahpi dingin tlai uh” tiah forhfialnak bia a chim hi si.
Global Center for R2P (GCR2P) cu US ram New York khuapi ah a ummi NGO pakhat asi. Ramdang buainak kong a hlat i UN ralkap thlah (R2P) a herh maw herhlo ti ruahnak a chuahtu le UN forhfialtu asi. “Myanmar ram ah ralkap nih mipi an thah thluahmah hna caah UN ralkap thlah (R2P) a herh” ti zongin forhfialnak cathanh a rak chuah. Nain, UN asi lo caah nawlngeitu asi lo.
Simon Adams nih, “ASEAN nih hin Min Aung Hlaing zaka ah Rammi Lungrualnak Cozah (NUG) hruaitu pawl a sawm hna awk si deuh,” ti zongin Twitter ah a ṭial.
Asia Nichuah Thlanglei Ram 10 Funtomnak Bu (ASEAN) nih a ra laimi April 24 ah Indonesia khualipi Jakarta ah Myanmar kong meeting tuah an timh. Mah meeting ahcun uknak firtu Myanmar ralkap bawizik Min Aung Hlaing a kai ve lai, tiah Thailand cozah nih April 17 ah a chim.
Thailand cozah hruaitu Prime Minister pa hi ralkap bawizik a rak si ve nain 2014 ah uknak a firmi si. Min Aung Hlaing bantuk minung asi caah Min Aung Hlaing zong nih uknak a firka ah “rak ka bawm” tiin ca a rak kuat.
ASEAN chungtel ram hruaitu pawl nih cun uknak firtu ralkap le tlaihmi mipi cozah hi i rem dingin biaruahnak ngei hna seh, ti an duh.
Cun, ASEAN chungtel ram pawl nih hartong Myanmar mipi bawmhnak pek zong an timh hna, mah hnu ah piahtana hi a phi kawl dingin ralkap le mipi cozah bia i ruah hna seh ti an duh.
NUG biachimtu Dr. Sasa nih, “ASEAN nih lainawng pa Min Aung Hlaing nan sawm ahcun Myanmar mipi na kan nehsawh asi lai. Kan ram ah thahnawnnak a dongh i democracy a len ṭhan khawhnak hnga NUG cozah tu hi kan sawm uh,” tiah April 16 ah a rak chim.
“Ralkap cozah sinah bawmhnak nan pek ahcun hartong mipi sin phan loin anmah ralkap caah a cang dih lai,” tiah ralrin peknak bia zong a chim.
Nain, atutiang ahcun ASEAN nih lainawng pa Min Aung Hlaing lawng chawnh an duh.
Min Aung Hlaing nih mipi cozah uknak a chuh hnu in minung 730 a thah cang hna. 3,152 a tlaih cang hna. 871 zong tlaih dingin nawl (warrant) a chuah i kawl cuahmah hna lio asi.
